Կենտրոն և Նորք-Մարաշ վարչական շրջանների ընդհանուր իրավասության դատարանում վկաների բացակայության պատճառով այսօր հետաձգվեց պետական դավաճանության գործով դատական նիստը։ Այսօր պետք է սկսվեր վկաների հարցաքննությունը, որոնցից երկուսը մեղադրյալներից Կարինե Ղումաշյանի որդիներն են։
Մեղադրող դատախազը միջնորդեց հաջորդ նիստին վկաներին բերման ենթարկելու միջնորդություն կայացնել։ Դատավորն էլ բավարարեց միջնորդությունը՝ հավելելով, որ ինքը միտում է տեսնում վկաների չներկայանալու մեջ. քանի որ վերջիններս Կարինե Ղումաշյանի հարազատ որդիներն են, ապա, ըստ դատավորի, չեն ցանկանում վկայություն տալ իրենց մոր դեմ:
Բացի այդ՝ այսօրվա դատական նիստին մեղադրյալներից Կարինե Ղումաշյանի և Ռաֆիկ Պապոյանի պաշտպանները միջնորդեցին վերացնել իրենց պաշտպանյալների տեսակցությունների և հեռախոսային խոսակցությունների վրա շուրջ մեկ տարի դրված արգելքը։ Մեղադրող դատախազը, սակայն, առարկեց միջնորդության դեմ, իսկ դատավորը որոշում կայացրեց միջնորդության քննարկումը հետաձգել մինչև դատաքննության ավարտը։
Հաջորդ դատական նիստը նշանակվեց մարտի 2-ին։
Հիշեցնենք, որ այս գործով անցնող երեք ամբաստանյալները մեղադրվում են այն բանում, որ բնակվելով Թուրքիայում՝ հավաքագրվել են այդ երկրի տարածքում գործունեություն ծավալած Ադրբեջանի հետախուզական ծառայությունների աշխատակիցների կողմից և կատարել այդ հետախուզական ծառայության առաջադրանքները՝ Հայաստանից Թուրքիա ժամանած ՀՀ քաղաքացիների միջից ընտրել Ադրբեջանի հետախուզական ծառայությունների համար հետաքրքրություն ներկայացնող անձանց ու հավաքագրման նպատակով ծանոթացնել նրանց հետ, բացի այդ, գումարի դիմաց տեղեկություններ փոխանցել ադրբեջանական հատուկ ծառայություններին սոցիալական ցանցերի միջոցով։
Մեղադրյալներից 4-րդին՝ 18-ամյա Դիանա Գորոյանին էլ մեղադրանք է առաջադրվել այն բանի համար, որ նա իր հորաքրոջ աղջիկը հանդիսացող Կարինե Ղումաշյանից տեղեկացել է, որ Թուրքիայում գտնվելու ժամանակ ծանոթացել է Արման անունով ներկայացած մի անձի հետ, որը գումար և նվերներ է տրամադրել նրան, հեռախոսային խոսակցության ընթացքում Կարինե Ղումաշյանից իմացել է, որ Արման անունով ներկայացած այդ անձնավորությունը արտասահմանյան հետախուզական ծառայության աշխատակից է: Գիտակցելով, որ խոսքը գնում է վերոհիշյալ Արմանի կողմից Կարինե Ղումաշյանին հավաքագրելու, ինչպես նաեւ Կ. Ղումաշյանի որդուն՝ Տիգրան Կարապետյանին, հավաքագրելու նախապատրաստության, այն է նախապատրաստվող պետական դավաճանության մասին, Դիանա Գորոյանը այդ մասին չի հայտնել իրավապահ մարմիններին: