ԱՄՆ պետքարտուղար Ջոն Քերին ակնկալում է, որ Սիրիայում հակամարտության խաղաղ կարգավորման հարցով համաժողովը տեղի կունենա հունիսի սկզբին: Ինչպես հաղորդում է ITAR-TASS-ը, այս մասին պետքարտուղարը հայտարարել է Շվեդիայի մայրաքաղաք Ստոկհոլմում, որտեղ հանդիպումներ է ունեցել թագավորության արտգործնախարարի և վարչապետի հետ:
Ջոն Քերին չի համաձայնել մի շարք ԶԼՄ-ների պնդումների հետ, որոնց համաձայն Սիրիայի կառավարությունը չի մասնակցի այդ ֆորումին, որի անցկացման մասին ավելի վաղ պայմանավորվել են ԱՄՆ-ը և Ռուսաստանը:
Քերիի խոսքերով՝ եթե Սիրիայի նախագահ Բաշար Ալ-Ասադը հրաժարվի մասնակցել համաժողովին, դա նրա կողմից կլինի ևս մեկ լուրջ սխալ: «Չեմ կարծում, որ նման բան կլինի»,- ասել է ԱՄՆ պետքարտուղարը:
Ջոն Քերիի կարծիքով՝ Սիրիայի նախագահը տեղյակ է, թե ովքեր են մասնակցելու համաժողովին: «Ռուսները՝ Ռուսաստանի արտգործնախարար Սերգեյ Լավրովը արդեն փոխանցել է նրան մարդկանց անունները, որոնք կվարեն բանակցությունները»,- նշել է Քերին: Նրա խոսքերով՝ բոլոր շահագրգիռ կողմերը հակված են խաղաղ կարգավորման գործընթացին:
Քերին նշել է, որ եթե Ալ-Ասադը ամեն դեպքում չնստի բանակցությունների սեղանի շուրջ, սիրիական ընդդիմությունը կստանա հավելյալ օգնություն, կձեռնարկվեն հավելյալ ջանքեր, և դժբախտաբար, բռնությունը չի դադարեցվի:
Ավելի վաղ Սիրիայի տեղեկատվության նախարար Օմրան Ալ-Զաուբին հայտարարել էր, որ Դամասկոսը Սիրիայի հարցով միջազգային համաժողովին մասնակցելու որոշում կկայացնի միայն Ռուսաստանի և ԱՄՆ-ի նախաձեռնությունների մանրամասներին ծանոթանալուց հետո:
