Եվրասիական տնտեսական միության երկրների միջև համաձայնագիրն ասում է ՝ անդամ երկրների միջև ավելացված արժեքի հարկ չի կիրառվում:
Հայաստանն արդեն 1 տարի է անդամակցում է ԵԱՏՄ-ին, սակայն միության անդամ երկրներից, մասնավորապես Ռուսաստանից ավտոմեքենա ներկրողներից դեռևս շարունակում են ավելացված արժեքի հարկ գանձել:
Տեսակամրջի օգնությամբ Մոսկվայի, Երևանի ու Աստանայի միջև կազմակերպված ասուլիսի ընթացքում ԵԱՏՄ ինտեգրման և մակրոտնտեսության հարցերով նախարար Տատյանա Վալովայան հայտարարեց՝ ԵԱՏՄ երկրներից Հայաստան ավտոմեքենա ներմուծող ֆիզիկական անձանցից 20 տոկոս ավելացված արժեքի հարկի գանձումը, Հայաստանի իշխանությունների կողմից, հակասում է միության իրավապայմանագրային դաշտին:
Մեզ մոտ կան պատնեշներ, որոնք հստակորեն արգելված են օրենսդրությամբ, և դրանք պետք է վերացվեն: Անցած տարի Եվրասիական տնտեսական միությունում մենք վերացրել ենք մոտ 80 նման պատնեշներ և ակտիվորեն մոնիթորինգ ենք իրականացնում նման պատնեշները հայտնաբերելու նպատակով, որոնք նոր են կամ կրկին են հայտնվել: Ոչ տարիֆային պատնեշի մի օրինակ բերեմ, որը հստակ կերպով արգելված է օրենսդրությամբ՝ ավտոմեքենաներ ներմուծելիս ֆիզիկական անձանց նկատմամբ ավելացված արժեքի հարկի կիրառումը: Նման պատնեշ կար Ղազախստանում, այն վերացվեց: Սակայն այսօր նման պատնեշ է հայտնվել Հայաստանում:
ԵԱՏՄ-ին Հայաստանի անդամակցությանը դեմ ԱԺ ՀԱԿ խմբակցության պատգամավոր Հրանտ Բագրատյանը նկատում է՝ ինքն այս խնդրի մասին վաղուց էր բարձրաձայնել: Ասում է, եթե անդամակցել ենք՝ պետք է գոնե միության ընձեռած հնարավորություններից օգտվենք, ինչը սակայն չի արվում:
Ավտոներկրողների միությունից հաստատեցին՝ մինչ այս վճարել են ավելացված արժեքի հարկը, և եթե խնդիրը չլուծվի բողոքի ալիք կբարձրացնեն:
