Եվրամիությունը «ծանր հիվանդ է», եվրաինտեգրման նախագիծը «վարկաբեկված է մայրցամաքի զգալի հատվածում», իսկ ֆրանս-գերմանական առանցքը, որի վրա հենվում էր այդ նախագիծը, «վտանգված է» Բեռլինի ու Փարիզի միջև տնտեսական տարաձայնությունների պատճառով: Այս մասին են վկայում Եվրամիության 8 երկրներում (Մեծ Բրիտանիա, Գերմանիա, Հունաստան, Իսպանիա, Իտալիա, Լեհաստան, Ֆրանսիա, Չեխիա) Վաշինգտոնի Պյուի անվան հետազոտական կենտրոնի անցկացրած նոր հետազոտության արդյունքները, հաղորդում է ITAR-TASS-ը:
Համաձայն հարցման արդյունքների՝ ներկայում տնտեսության վիճակից գոհ են միայն գերմանացիները (75 %):
Եվրոպայում ճգնաժամի սկզբից ի վեր այդ հարցով լավատեսությունը նվազել է Իսպանիայում՝ 61 %-ով, Մեծ Բրիտանիայում՝ 22 %-ով, Չեխիայում ու Ֆրանսիայում՝ 21%-ով:
Հույների շրջանում ցուցանիշը կազմում է ընդամենը 1 %, իտալացիների շրջանում՝ 3 %, իսպանացիների՝ 4 %, ֆրանսիացիների՝ 9 %:
Ամերիկացի վերլուծաբանները պնդում են, որ «ոչ մի եվրոպական երկրում այնքան մեծ ուժով չի աճում ունայնությունն ու հիասթափությունը, որքան Ֆրանսիայում»: Դա արտահայտվում է կառավարության գործունեության ու ընդհանուր տնտեսության նկատմամբ գնահատականներում:
Հարցվածների 78 %-ին շատ է անհանգստացնում գործազրկությունը, 71 %-ին՝ պետական պարտքը:
Նվազում են նաև եվրոպական ղեկավարների վարկանիշները, այդ թվում՝ Գերմանիայի կանցլեր Անգելա Մերկելի: Իսկ Հունաստանի ու Իսպանիայի բնակչության մեծ մասը բացասաբար է վերաբերվում նրա գործունեությանը:
