ԱՄՆ-ում բժիշկ-անեսթեզիոլոգները ստանում են ամենաբարձր աշխատավարձը: Այս մասին հաղորդում է Forbes-ը՝ վկայակոչելով աշխատանքի վիճակագրության ամերիկյան բյուրոյի (BLS) նոր ուսումնասիրությունը:
Ուսումնասիրության տվյալների համաձայն՝ աշխատանքի յուրաքանչյուր ժամը միջին վիճակագրական անեսթեզիոլոգին բերում է 111.9 դոլար, իսկ տարեկան նրանք ստանում են 232.8 հազար դոլար:
Ինչպես նշում է թերթը, վարկանիշի առաջատար դիրքերում ներկայացված են գլխավորապես բժիշկները, այդ թվում՝ վիրաբույժները, գինեկոլոգները, թերապևտները: Հոդվածում նշվում է, որ նման դասավորվածությունը զարմանալի չէ, քանի որ բժշկությունը միշտ մեծ պահանջարկ է ունեցել: Բացի այդ, բժշկական կրթությունը և մասնագիտական պատասխանատվության ապահովագրումը բավականին թանկ արժեն:
Կորպորացիաների և ընկերությունների ղեկավարները դարձել են ոչ բժշկական ճյուղի միակ ներկայացուցիչները, որոնք վարկանիշային աղյուսակում զբաղեցրել են վերին հորիզոնականները: Նրանք տարեկան միջինը ստանում են 176.8 հազար դոլար:
