ՀԺԿ նախկին համակիր, այժմ Բելգիայում քաղաքական ապաստան ստացած Գրիշա Վիրաբյանը Հայաստանում է։ Այստեղ է իր վերաբերյալ ՄԻԵԴ-ի որոշումից հետո վերաբացված քրեական գործի շրջանակներում նախատեսված առերեսումների համար։ Առերեսում է նախատեսվում նաև Երևանի ոստիկանապետ Աշոտ Կարապետյնաի հետ։ Հիշեցնենք, որ Վիրաբյանը 2004 թվականի ապրիլի 14-ին ծեծի էր ենթարկվել, խոշտանգվել նախկինում ոստիկանության Արարատի մարզի վարչության պետի տեղակալի պաշտոնը զբաղեցնող, ներկայումս Երևանի ոստիկանապետ Աշոտ Կարապետյանի և մի շարք այլ ոստիկանների կողմից։ Մարդու իրավունքների եվրոպական դատարանը ճանաչել էր Վիրաբյանի խախտված իրավունքները և ՄԻԵԴ-ի որոշումից հետո Հայաստանում քրեական գործը վերաբացվել էր։
Վիրաբյանի խոսքերով՝ իրեն չի հետաքրքրում, որ ծեծի հիմնական մասնակիցներն այսօր ոստիկանությունում առանցքային պաշտոնյաներ են։ Նրանք, ըստ Վիրաբյանի՝ հանցագործներ են, և պետք է գտնվեն վերջիններիս համար նախատեսված համապատասխան տեղում։
Վիրաբյանն ասում է, եթե օրենքի սահմաններում չկարողանա հաջողության հասնել և իրեն դաժանորեն ծեծի ենթարկած անձիք չպատժվեն, պատրաստ է ինքնադատաստան տեսնել։
