PayPal վճարման համակարգի տեղեկատվական անվտանգության հարցերով տնօրեն Մայքլ Բարեթը հայտարարել է, որ մոտ ապագայում գաղտնաբառերը կփոխարինվեն գրանցումը ստուգելու ավելի պարզ և հուսալի միջոցներով՝ հաղորդում է Macworld UK-ը:
Ելույթ ունենալով Interop համաժողովին, որը տեղի է ունեցել մայիսի 6-10-ը՝ Լաս Վեգասում, Բարեթը քննադատել է ժամանակակից աշխարհում տարածված գրանցումը ստուգելու մեթոդները: Նրա խոսքերով՝ դրանք անվտանգ չեն և անհարմար են, ինչի պատճառով օգտատերերը կամ ամեն տեղ օգտագործում են նույն գաղտնաբառը, կամ ստեղծում են հեշտ գաղտնաբառեր, օրինակ՝ 12345 կամ password:
Գրանցումը ստուգելու երկու փուլից բաղկացած համակարգերը (երբ բացի մուտքանունից և գաղտնաբառից՝ պետք է գրել, օրինակ, հաղորդագրությամբ եկած հաստատման ծածկագիրը), որոնցից օգտվում են շատ ինտերնետ-ընկերություններ, Բարեթն անվանել է «երազանք՝ կարգավորող մարմնի համար, սակայն մղձավանջ՝ օգտատերերի համար»:
Գաղտնաբառերի փոխարեն Բարեթն առաջարկել է օգտագործել «գրանցում ստուգելու բիոմետրիկ սարքեր». օգտատերը կարող է գրանցվել կայքում՝ սքանավորելով մատը կամ աչքի ցանցաթաղանթը:
Ստուգման համակարգը մշակում է Fast IdentityOnline (FIDO) դաշինքը, որի մեջ ներառված են ընկերություններ, որոնք զբաղվում են համակարգչային անվտանգության հարցերով, և ինտերնետ-ընկերություններ: Դաշինքի նախագահը Բարեթն է:
Բարեթի կանխատեսումների համաձայն՝ այդ համակարգը կհայտնվի արդեն 2013թ., այդ թվում նաև՝ բջջային հեռախոսներում: Նրա գնահատմամբ՝ համակարգն ավանդական գաղտնաբառերն ամբողջությամբ դուրս կմղի մի քանի տարի հետո: Նա նշել է, որ PayPal-ը ևս նախատեսում է օգտվել FIDO-ից: