Բենղազիում զինվորականների օգնությամբ ամերիկացի դիվանագետներին հարձակումից փրկել հնարավոր չէր. վարչակազմի քննադատները զինված ուժերի մասին «ծաղրանկարային» պատկերացում ունեն: Այսպես է կարծում ԱՄՆ պաշտպանության նախկին նախարար Ռոբերտ Գեյթսը:
Խոսքը 2012թ.-ի սեպտեմբերին Բենղազիում ԱՄՆ-ի հյուպատոսարանի վրա զինված հարձակման մասին է:
«Առանց իրադրության, սպառնալիքի տեսակի, վայրի մասին հետախուզական տվյալների՝ հատուկ նշանակության որևէ ջոկատ ուղարկելը շատ վտանգավոր կլիներ: Մեր զինվորները, ինչպես հայտնի է, ծրագրում են գործողությունները և պատրաստվում են դրանց, իսկ այս դեպքում դրա ժամանակը չկար»,- ասել է Գեյթսը CBS հեռուստաընկերության եթերում:
Ինչ վերաբերում է գրոհայիններին ռազմական ինքնաթիռով վախեցնելուն, նրա խոսքերով՝ քննադատները հաշվի չեն առնում, թե Լիբիայի անկումից ի վեր ինչ քանակությամբ զենիթային հրթիռներ են անհետացել Քադաֆիի օրոք:
«Նման պայմաններում ես հավանություն չէի տա թեկուզ մեկ ինքնաթիռ Բենղազի ուղարկելուն,- ասել է նախկին նախարարը:- Անկեղծ ասած՝ եթե ես այդ ժամանակ զբաղեցնեի Պենտագոնի ղեկավարի պաշտոնը, ես կընդունեի այնպիսի որոշումներ, ինչպիսիք ընդունվել են»:
