Պակիստանում ավարտվեցին խորհրդարանի ստորին պալատի և մարզային օրենսդիր ժողովների ընտրությունները: Այս մասին հաղորդում է Agence France-Presse-ն: Քվեարկությունն ուղեկցվել է երկրի տարբեր հատվածներում մի շարք ահաբեկչություններով, որի հետևանքով զոհվել է 20 մարդ:
Երկրի ընտրական հանձնաժողովի նախագահը հայտարարել է, որ ընտրությունները հաջող են անցել: Նա կոնկրետ տեղեկություններ չի հայտնել ընտրողների քանակի մասին, սակայն նշել է, որ ակտիվությունը բարձր է եղել, և իշխանությունները նույնիսկ ստիպված են եղել 1 ժամով երկարաձգել տեղամասերում աշխատանքը: Ներկայում դրանք գրեթե բոլորը փակ են: Աշխատանքը շարունակում են միայն Կարաչի քաղաքի 5 ընտրական տեղամասեր, ովքեր աշխատանքը ուշացումով են սկսել: Իսկ հանձնաժողովն արդեն սկսել է ձայների հաշվարկը:
Ընտրությունների օրը Պակիստանում սկսվել է ահաբեկչություններով: Մասնավորապես, Կարաչիում մահափորձ է կատարվել Ժողովրդական ազգային կուսակցության ներկայացուցչի վրա, ով կոչ է արել խստացնել պայքարը Պակիստանում գործող «Թալիբան» շարժման դեմ: Ռումբի պայթելու հետևանքով զոհվել է 11, վիրավորվել 40 մարդ: Քաղաքական գործիչը չի տուժել: Եվս մեկ պայթյուն տեղի է ունեցել Պեշվարայում, առնվազն 8 մարդ վիրավորվել է: Բացի այդ, գրոհայինները երկրի հարավ-արևմուտքում կրակել են մարդկանց բազմության վրա՝ սպանելով 4-10 մարդու:
