Երեկ Ազատության հրապարակում հրավիրված հանդիպման ընթացքում «Ժառանգության» առաջնորդ Րաֆֆի Հովհաննիսյանը կոչ արեց Դաշնակցությանը, Ժիրայր Սեֆիլյանին, Գագիկ Ծառուկյանին և Լևոն Տեր-Պետրոսյանին մոռանալ ամեն ինչ և միավորվել:
Քաղաքագետների միության նախագահ Հմայակ Հովհաննիսյանի կարծիքով` այս առաջարկը բավականին ուշացած է և պետք է արվեր եթե ոչ ավելի շուտ, ապա գոնե Երևանի ավագանու ընտրությունների հաջորդ օրը. «Պարզապես բանը բանից անցավ, որ կոչ արեց։ Այդ կոչը պետք է աներ մինչև ընտրությունները կամ առհասարակ չպետք է գնային ընտրությունների»:
Հմայակ Հովհաննիսյանը նշեց, որ օրինակ՝ խորհրդարանական ընտրություններից հետո միասնական շտաբը հանդես եկավ հայտարարությամբ, հայտարարության տեքստի տակ ստորագրել էին միասնական շտաբին միացած բոլոր կուսակցությունները, իսկ հիմա օրեր են անցել Երևանի ավագանու ընտրություններից և անգամ միասնական հայտարարություն չկա դրա վերաբերյալ. «ԲՀԿ-ին բերեցին տեղավորեցին ընդդիմության դաշտում՝ միևնույն ժամանակ ընդունելով նրա «ոչ իշխանական»՝ անորոշ և հեղհեղուկ ձևակերպումը: Եթե ընդունել էին այդ ձևակերպումը, գոնե այդ քողի ներքո, այդ ձևակերպման տարրական մոտեցումների անհրաժեշտությունից, ընդհանրական մոտեցումների հանդես գալու անհրաժեշտությունից դրդված՝ պետք է հանդես գային հայտարարությամբ»:
Քաղաքագետի գնահատմամբ՝ միավորումը միանգամայն հավանական տարբերակ կարող էր լիներ և նույնիսկ կարող էր արդյունավետ լինել, բայց այսօր ո՛չ հարթակում, ո՛չ էլ այլ տեղ՝ կանգնած չեն այնպիսի քաղաքական գործիչներ, որոնք կարող են միավորվել. «Չեմ տեսնում այն գործիչների աստղաբույլը, որը կկարողանար մի ընդհանուր հունի մեջ դնել հասարակության պահանջները, ուղղորդել նրանց տրամադրությունները՝ մի հստակ մարտավարության և ռազմավարության շրջանակներում»։
