Ուրբաթ ԱՄՆ-ի հարկային ծառայությունը (IRS) ներողություն է խնդրել, որ 2012թ. «սխալմամբ» անցկացրել է աջ ակտիվիստների (նոյեմբերին վերընտրված Բարաք Օբամայի հակառակորդներ) ուժեղացված ստուգումներ՝ հաղորդում է RIA Novosti-ն:
Ծառայության հաղորդագրության համաձայն` հավելյալ ստուգումների են ենթարկվել ոչ հարկային կարգավիճակի հավակնող 75 կազմակերպություններ , որոնց անվան մեջ եղել են «Թեյի կուսակցություն» կամ «պատրիոտ» բառերը: Նման անվանումներ հիմնականում կրում են Հանրապետական կուսակցության պահպանողական շարժման կազմակերպությունները:
IRS ստորաբաժանման ղեկավար Լոիս Լերները, որը պատասխանատու է կազմակերպություններին հարկերից ազատելու համար, հայտարարել է, որ ի սկզբանե թույլ են տրվել սխալներ, սակայն դրանք քաղաքական կամ կուսակցական ենթատեքստ չեն ունեցել: Ծառայությունը սխալի համար մեղադրել է աշխատակիցներին` հայտարարելով, որ ղեկավարությունը չի մասնակցել այդ որոշմանը: IRS-ը նաև հավաստիացրել է, որ սխալը ուղղվել է դեռևս նախորդ տարի:
ԱՄՆ-ի Կոնգրեսի ներկայացուցիչների պալատի հանրապետական մեծամասնության առաջնորդ Ջոն Բեյները խստորեն քննադատել է իշխանություններին այս կապակցությամբ, իսկ նախագահի մամլո քարտուղար Ջեն Քարնին ընդունել է, որ նման գործողություններն անթույլատրելի են, և հստակեցրել է, որ IRS-ը անկախ ծառայություն է, որում աշխատում են միայն երկու քաղաքական գործիչ:
