Բրիտանական դեսպանատունը ժամանակավորապես Լիբիայից դուրս է բերում աջակցող անձնակազմի մի մասը: Դրա պատճառը երկրում անկայուն իրավիճակն է: Այս մասին տեղեկացրել է Reuters գործակալությունը՝ վկայակոչելով դեսպանատան հայտարարությանը:
«Անվտանգության նկատառումներից ելնելով և հաշվի առնելով շարունակվող քաղաքական անկայուն իրավիճակը՝ բրիտանական դեսպանատունը ժամանակավորապես երկրից դուրս է բերում աշխատակազմի մի մասը»,- ասվում է հայտարարության մեջ, որտեղ նշվում է նաև, որ դիվանագիտական առաքելությունը շարունակում է աշխատել սովորական ռեժիմով:
Նախօրեին իր աշխատակազմի մի մասի Տրիպոլիից դուրս բերման մասին էր հայտարարել ԱՄՆ Պետդեպարտամենտը: Գերատեսչությունը խորհուրդ էր տվել ԱՄՆ-ի քաղաքացիներին, անվտագության նկատառումներից ելնելով, Լիբիա չայցելել:
Լիբիան 2011 թ. տեղի ունեցած հեղափոխությունից հետո երկրի և խաղաղ կյանքի վերականգնման հարցում դժվարություններ է ունենում:
Ապրիլի 28-ից մի քանի հարյուր մարդ շրջափակման մեջ էին պահում ԱԳ և ՆԳ նախարարությունների շենքերը՝ պահանջելով իշխանությունից հեռացնել Քադաֆիի նախկին կողմնակիցներին և աշխատանքով ապահովել այն զինծառայողներին, ովքեր աջակցել էին Քադաֆիի ռեժիմի անկմանը: Շրջափակումը դադարեցվել էր միայն իշխանությունների կողմից համապատասխան օրենք ընդունելուց հետո: Սակայն երկուշաբթի օրը բողոքավորները կրկին շրջափակել էին կառավարական շենքը՝ պահանջելով Լիբիայի վարչապետից հրաժարվել պաշտոնից:
Դրանից բացի, վերջին ամիսներին անհայտ անձինք պայթեցրել էին առնվազն չորս ոստիկանական բաժիններ:
