Եվրախորհրդարանում Լեհաստանի պատգամավոր Մարեկ Միգալսկու նախաձեռնությամբ մեկնարկել է «Լուկաշե՛նկո, Puck You!» (puck-տափօղակ) ակցիան, որն ուղղված է 2014-ի Հոկեյի աշխարհի առաջնության անցկացման իրավունքից Բելառուսին զրկելուն:
Ինչպես հաղորդվում է Միգալսկու պաշտոնական էջում, ակցիան նվիրված է Հոկեյի միջազգային ֆեդերացիայի (IIHF) համագումարին, որը կանցկացվի մայիսի 16-19-ը՝ Ստոկհոլմում:
«Մենք համաձայն չենք, որ նման խոշոր մարզական միջոցառումներ անցկացվեն Եվրոպայի վերջին բռնապետությունում»,- ասվում է պատգամավորի էջում: Ակցիայի կազմակերպիչների խոսքով՝ այս ուղերձը ֆեդերացիայի՝ առաջնությունն այլ երկիր տեղափոխելու վերջին հնարավորությունն է:
Ակցիայի շրջանակում մայիսի 18-ին Միգալսկին շվեդական Östgruppen իրավապաշտպան կազմակերպության հետ կանցկացնի պիկետ Ստոկհոլմում՝ IIHF-ի գրասենյակի մոտ: Facebook-ում նաև ստեղծվել է հատուկ խումբ, որտեղ յուրաքանչյուրը կարող է արտահայտվել այդ հարցի շուրջ:
Ավելի վաղ Բելառուսին Հոկեյի աշխարհի առաջնության անցկացման իրավունքից զրկելու պահանջով հանդես էին եկել տարբեր իրավապաշտպան կազմակերպություններ ու քաղաքական գործիչներ: Մասնավորապես, իրենց բացասական դիրքորոշումն էին արտահայտել ամերիկացի կոնգրեսականները, սակայն ֆեդերացիայում կարծում են, որ սպորտը չպետք է կապել քաղաքականության հետ:
Անձամբ Բելառուսի նախագահ Ալեքսանդր Լուկաշենկոն հայտարարել է, որ հանրապետությունը վաստակել է այդ առաջնությունն անցկացնելու իրավունքը, և այդ իրավունքից զրկելը հարված կլինի ֆեդերացիայի, հնարավոր է նաև՝ ողջ համաշխարհային սպորտի իմիջին:
