Չնայած Վրաստանում կատարված իշխանափոխությանը՝ երկիրը, ինչպես նախկինում, շարունակում է հակված մնալ եվրոպական ինտեգրման կուրսին: Ինչպես հաղորդում է «Գրուզիա Օնլայն»-ը, այս մասին Պրահայում «Ազատություն» ռադիոկայանի գլխավոր գրասենյակի աշխատակիցների հետ հանդիպմանը հայտարարել է Եվրամիության ընդլայնման և հարևանության քաղաքականության հարցերով հանձնակատար Շտեֆան Ֆյուլեն:
Նրա խոսքերով՝ Վրաստանի նոր կառավարությունը՝ Բիձինա Իվանիշվիլիի գլխավորությամբ, «խոսքով և գործով» ապացուցում է իր հետաքրքրությունը դեպի այն ուղին, որը վերջին հաշվով կբերի նրան դեպի ԵՄ և ՆԱՏՕ: Ֆյուլեն գոհունակություն է հայտնել համագործակցության «առաջին նշաններից», որոնք նկատվել են Իվանիշվիլիի և Սաակաշվիլիի միջև:
Նա ևս մեկ անգամ հաստատել է, որ Եվրամիությունը հավատարիմ է մնում իր դիրքորոշմանը՝ կապված Վրաստանի տարածքային ամբողջականության հետ, և Ռուսաստանին կոչ է արել հարգանք ցուցաբերել ստանձնած պարտականությունների նկատմամբ և հրաժարվել Աբխազիայում և Հարավային Օսիայում ռազմական բազաներ կառուցելուց:
