Պենտագոնի Հրթիռային պաշտպանության գործակալության տնօրեն, փոխծովակալ Ջեյմս Սիրինգը հայտնել է, որ չի գաղտնազերծել ոչ մի տվյալ Ռուսաստանին փոխանցելու համար, և ամերիկյան ղեկավարությունում ոչ ոք իրեն նման խնդրանքով չի դիմել:
Վերջերս ԱՄՆ պաշտպանության նախարարի վարչակազմում Սիրինգին հարցրել են, թե ՀՀՊ համակարգի բաղադրիչ մասերից մեկի պարամետրերից որոշ տվյալներ գաղտնի՞ են, ինչին նա հաստատական պատասխան է տվել: Այս մասին հայտնում է ITAR-TASS-ը:
Երեկ Սիրինգը հայտարարել էր, որ գործակալությունը քննարկել է իր համակարգերի մասին տվյալները գաղտնազերծելու հնարավորությունը՝ մեղմելու համար Ռուսաստանի մտահոգությունները:
Սիրինգի խոսքով՝ ինքը քննարկել է նման հնարավորությունը պաշտպանության նախարարության ղեկավարության հետ: Տվյալների շարքում, որոնք կարող են գաղտնազերծվել, նա մասնավորապես անվանել է հակահրթիռների արագությունը:
ԱՄՆ նախագահի՝ ազգային անվտանգության հարցերով նախագահի օգնական Թոմաս Դոնիլոնը Մոսկվա այցի ժամանակ ապրիլի 15-ին ՌԴ նախագահին է փոխանցել Օբամայի ուղերձը, որում մասնավորապես եղել է առաջարկ առևտրա-տնտեսական համագործակցության զարգացման վերաբերյալ, շոշափվել են ռազմա-տեխնիկական համագործակցության հարցեր, այդ թվում՝ ՀՀՊ-ին և միջուկային խնդրին վերաբերող:
Մի քանի օր անց Վլադիմիր Պուտինի օգնական Յուրի Ուշակովը հայտարարել է, որ Ռուսաստանին դուր չեն եկել ՀՀՊ-ի վերաբերյալ ԱՄՆ նախագահի նոր նախաձեռնությունները:
Ուշակովի խոսքով՝ առաջարկները գնում են Հեյգելի՝ նախկինում մատնանշած ուղով: Նշենք, որ ապրիլի վերջին Ռուսաստանի արտգործնախարար Սերգեյ Լավրովը ՀՀՊ-ի շուրջ իրավիճակն անվանել էր փակուղային:
