Միացյալ Թագավորությունը փայփայում է հարաբերությունները Չինաստանի հետ, այդ իսկ պատճառով Տիբեթը դիտարկում է որպես Չինաստանի անքակտելի մաս: Նման հայտարարությամբ է հանդես եկել Թագավորության կառավարության ղեկավար Դևիդ Քեմերոնը: Այս մասին տեղեկացնում է ITAR-TASS-ը:
Ինչպես ավելի վաղ հայտնել էին բրիտանական ԶԼՄ-ները, Չինաստանը ոչ պաշտոնապես արգելել է բրիտանացի վարչապետի, ինչպես նաև փոխվարչապետ Նիք Քլեգի՝ երկիր մուտքը, որի պատճառը անցած տարի նրանց և Դալայ Լամայի հանդիպումն էր:
Sky News-ի տեղեկություններով՝ Քեմերոնը պետք է հանրապետություն այցելեր անցած աշնանը, սակայն այցը կասեցվել է: Ծրագրվում էր, որ այս տարի Մեծ Բրիտանիա կայցելի Չինաստանի վարչապետ Լի Կեցյանը, սակայն ներկայում այդ ուղևորության նախապատրաստությունը նույնպես դադարեցված է:
«Եկեք բացարձակ անկեղծ խոսենք, մենք ցանկանում ենք Չինաստանի հետ ունենալ ամուր և արդյունավետ կապեր, որոնք, ինչպես կարծում եմ՝ համապատասխանում են երկու պետությունների շահերին »,- հայտարարել է վարչապետը՝ ելույթ ունենալով երկրի խորհրդարանում: «Մենք չենք աջակցում Տիբեթի անկախությանը և հարգում ենք Չինաստանի ինքնիշխանությունն այդ տարածքում»,- ասել է Քեմերոնը:
Ինչպես հաղորդվում է՝ Լոնդոնը մտավախություն ունի, որ դիվանագիտական հարաբերությունների հնարավոր սառեցումը սպառնալիքի տակ կդնի չինական կողմի ներդրումները Մեծ Բրիտանիայի տնտեսությունում, որոնք անցած տարի հասել են 12.4 միլիարդ դոլարի:
Ինչպես հայտնել են վարչապետի պաշտոնական ներկայացուցիչները, Քեմերոնը հույս ունի Չինաստան այցելել մինչև այս տարեվերջ:
