Ֆրանսիան մտադիր է ճնշում գործադրել Եվրամիության երկրների վրա՝ ահաբեկչության դեմ պայքարում ավելի ակտիվ համագործակցության հասնելու համար: TASS-ի փոխանցմամբ՝ այս մասին France 5 հեռուստաալիքի եթերում կիրակի հայտարարել է Ֆրանսիայի ՆԳ նախարար Բեռնար Կազնյովը՝ խոսելուվ Ամստերդամում հունվարի 25-ին նշանակված ԵՄ Արդարադատության և ներքին գործերի հարցերով խորհրդի նիստի մասին:
«Ֆրանսիան Եվրամիության ինստիտուտների և անդամ-երկրների վրա զգալի ճնշում կգործադրի, որպեսզի այդ խորհրդակցությունում ընդունվի հետագա գործողությունների ժամկետի ցուցակի նախագիծ, ինչը թույլ կտա առաջին կոնկրետ միջոցառումները կիրառել այս տարվա առաջին եռամսյակի վերջին»,- ասել է նախարարը:
Կազնյովը քննադատել է ԵՄ մի շարք պետությունների, որոնք բավարար ծավալի տեղեկություններ չեն տալիս շենգենյան համակարգի տեղեկատվական բազային՝ որոնվող անձանց և նրանց մասին, որոնց մուտքը ԵՄ տարածք արգելված է:
Նա անհրաժեշտ է համարել, որ տվյալների շենգենյան բազան «միացվի հանցագործությունների վերաբերյալ մյուս բոլոր տվյալների բազաներին»: Նա նաև կողմ է արտահայտվել, որ քննչական մարմիններին «մուտքի հնարավորություն տրվի Eurodac-ի տվյալների բազային, որտեղ տեղեկություններ են հավաքվում շենգենյան գոտի մտնող ապաստան խնդրողների և սահմանը խախտողների մասին»:
