Մինչ Ազգային վիճակագրական ծառայությունը փաստում է այն մասին, որ առաջին անհրաժեշտության ապրանքների գները 2015 թվականի դեկտեմբերին 2014-ի դեկտեմբերի համեմատ որոշ դեպքերում աճել են, որոշ դեպքերում էլ էական փոփոխություն չեն արձանագրել, տնտեսական մրցակցության պաշտպանության պետական հանձնաժողովի հրապարակումները խոսում են զգալի գնանկման մասին:
Պիպոյանի դիտարկմամբ՝ գների վերաբերյալ լիարժեք պատկերացում կազմելու համար պետք է նաև ուսումնասիրել ապրանքների որակն ու քաշը: Եթե հացամթերքի շուկայում գնաճ չի արձանագրվել, ապա դրա քաշը նվազել է, այստեղ արձանագրվում է անտեսանելի գնաճ:
Եթե պարենային ու ոչ պարենային ապրանքների համաշխարհային գները 2015 թվականի վերջում էականորեն նվազել են նախորդ տարվա համեմատ, ապա Հայաստանում նվազման միտում չի նկատվում: Պատճառն ըստ Պիպոյանի՝ երկրում մրցակցության բացակայությունն է, ընդ որում պետք է մրցակցեն ոչ թե արտադրողները, այլ համեմատության պետք է դրվի նրանց համարժեք արտադրանքը:
Խոսելով Ազգային վիճակագրական ծառայության և տնտեսական մրցակցության պաշտպանության պետական հանձնաժողովի կողմից էականորեն տարբեր գնային պատկերներ ներկայացնելու մասին, Պիպոյանը նկատեց՝ գործադիր իշխանության երկու օղակներից մեկը գործել է սխալ մեթոդաբանությամբ:
