Իրանն ու ԱՄՆ-ն բանակցություններ են վարում երկու երկրների միջև չվերթների վերականգնման վերաբերյալ: Այդ մասին կիրակի օրը հայտարարել է Իրանի ամենախոշոր ավիափոխադրող Iran Air ընկերության տնօրեն Ֆարհադ Փարվարեշը, գրում է TASS-ը:
«Իրանի քաղաքացիական ավիացիան ներկայումս բանակցություններ է վարում Իրանի և ԱՄՆ-ի միջև չվերթների վերականգնման ուղղությամբ»,- ասել է Փարվարեշը:
Մինչև 1979-ի իսլամական հեղափոխությունը ամենօրյա չվերթներ են իրականացվել Թեհրանի և Նյու Յորքի միջև: Փարվարեշը հույս է հայտնել, որ դրանք կվերականգնվեն: «Իրանի հանդեպ պատժամիջոցների վերացումից հետո Iran Air-ին թույլ է տրվել նորից վառելիք լիցքավորել Արևմտյան Եվրոպայի օդանավակայաններում: Ավելի վաղ իրանական ինքնաթիռները ստիպված էին տեխնիկական վայրէջք կատարել Արևմտյան Եվրոպայի երկրներում հեռավոր չվերթների համար լրացուցիչ վառելիք լիցքավորելու համար»,- նշել է Փարվարեշը:
