ՀԺԿ-ի նախկին համակիր, Բելգիայում բնակվող Գրիշա Վիրաբյանը նախկինում «Առաջին լրատվական»-ի հետ զրույցում կարծիք էր հայտնել, թե «Բարգավաճ Հայաստանը» երկրորդ նախագահ Ռոբերտ Քոչարյանի ստեղծած կուսակցությունն է և նրա բոլոր գործողությունները պայմանավորված են հենց Քոչարյանի ցանկությամբ:
Գրիշա Վիրաբյանից հետաքրքրվեցինք, թե ինչ կարծիք ունի վերջին օրերին Վարդան Օսկանյանի հայտարարությունների վերաբերյալ՝ առ այն, որ կուսակցությունը պետք է սեպտեմբերին իրեն ընդդիմադիր հռչակի և հիմա էլ ընդդիմադիր կեցվածք ունի: Վիրաբյանի հավաստմամբ՝ ԲՀԿ-ն, եթե հռչակվի էլ ընդդիմադիր, միևնույն է՝ ընդդիմադիր լինել չի կարող, որովհետև միայն մեկ «ներողությամբ» ընդդիմադիր չեն դառնում. «Պարզապես ընտրություններն են մոտենում, «Բարգավաճ Հայաստանն» էլ, բնական է, քվե ստանալու համար պետք է նման հայտարարություններով հանդես գա: Եթե գումարենք այն հանգամանքը, որ լարվածություն կա հետընտրական զարգացումներից հետո, բնական է, որ «Բարգավաճը» կցանկանա ընդդիմադիր երևալ։ Բացի այդ, ընդդիմադիր դաշտը հիմա բզկտված է, անճանաչելի վիճակ է, նրանք էլ այդ ամենից օգտվում են»,- ասաց նա:
Պատասխանելով այն հարցին, որ եթե, այնուամենայնիվ, ընտրություններից հետո ԲՀԿ-ն իրեն ընդդիմադիր հռչակի, ի՞նչ կարող է դա նշանակել, արդյո՞ք կուսակցության ներսում երկփեղկվածություն չի առաջանա, Վիրաբյանն ասաց. «Մենք շատ ենք լսել, որ «Բարգավաճից» հայտարարում են, թե կոալիցիա են մտնում, կոալիցիայից դուրս են գալիս, նախագահական ընտրություններին չեն մասնակցում, կամ հակառակը՝ իրենց առաջնորդին բնորոշ են գործում։ Նրանց բոլոր հայտարարությունները պոպուլիստական են և ոչ քաղաքական, ուրիշ ոչինչ, նրա հետ որևէ հույսեր կապել պետք չէ, ես չեմ տեսնում որևէ շանս, որ «Բարգավաճը» կարող է դառնալ ընդդիմադիր կուսակցություն: Ուղղակի շատ փոքր հատված, հնարավոր է՝ անկեղծորեն դրան հավատալով, մտել են կուսակցություն, բայց ընդդիմադիր դառնալու դեպքում այդ կուսակցությունից ոչինչ չի մնա»:
Այն հացրին, թե հնարավո՞ր է այդ փոքր հատվածի մեջ է մտնում նաև Վարդան Օսկանյանը, Վիրաբյանը նշեց. «Վարդան Օսկանյանը Քոչարյանի խոսնակի դերն է կատարում, և այն քայլերը, որ ինքը անում է՝ հետախուզական քայլեր է անում Քոչարյանի համար: Բնական է, որ անձամբ ինքն ընդդիմադիր է, որովհետև իր դեմ քրեական գործ է հարուցված, ուրիշ կերպ լինել չի կարող, բայց ես սուբյեկտիվորեն գնահատում եմ իրեն տարբեր իրադարձությունների ժամանակ իր կատարած քայլերով, նաև՝ մարտի մեկի»:
Արձագանքելով մեր այն դիտարկմանը, թե երեկ հրավիրված ասուլիսում Օսկանյանը ներողություն էր խնդրել 1991-2008 թթ.տեղի ունեցած իրադարձությունների համար, Գրիշա Վիրաբյանն ասաց. «Մարտի մեկի կատարվածը պետք չէ ընդհանուր դիտարկել, ներողություն խնդրել և վերջ: Մարտի մեկն ու հոկտեմբերի 27-ն այնքան ցավալի դեպքեր են, որ մեկ բառով կամ մեկ ներողությամբ ոչինչ անել չես կարող: Ես դա չեմ համարում անկեղծ, որովհետև ներողություն խնդրողը նաև պետք է մատնացույց անի իրական մեղավորներին»:
Մեր զրուցակցի կարծիքով՝ երբ «Բարգավաճ Հայաստանը» գոյություն չունենա, նշանակում է Քոչարյանն այլևս չի ուզում զբաղվել քաղաքականությամբ. «Դա իր ստեղծած կուսակցությունն է, իր ծրագրերն է առաջ տանում, ինքն իր ծրագիրն իրականացնում է Վարդան Օսկանյանի միջոցով, մանավանդ որ վերջինիս ինքը գործուղեց այդ կուսակցություն»:
Ի դեպ, Գրիշա Վիրաբյանի գնահատմամբ, ԱԺ նախագահ Հովիկ Աբրահամյանն էլ «Բարգավաճ Հայաստանում» ստվերային դերակատարում ունի և իր խնամիական կապերի միջոցով փորձում է «իր ձեռքը պուլսին պահել»:
