Ադրբեջանի Մինգյաչևիր քաղաքում տեղի բնակչուհի, 20-ամյա Նիլուֆեր Մագերամովան ինքնասպան է եղել: Այս մասին հայտնում է 1news.az-ը: Նա ցած է նետվել 6-րդ հարկի պատուհանից:
Կատարվածի առթիվ հարուցվել է քրեական գործ «Ինքնասպանության հասցնելը» հոդվածով: Չի հստակեցվում, թե ում են կասկածում ինքնասպանությանը առնչություն ունենալու մեջ:
Haqqin.az-ը նշում է, որ մահացածը եղել է ընդդիմադիր երիտասարդական NIDA («Բղավոց») շարժման ակտիվիստ: Կայքի տվյալներով՝ սոցցանցերում որպես նրա ինքնասպանության պատճառ նշվում է «հետապնդումը, որին աղջիկը ենթարկվել է բլոգում քաղաքական գրառումներ անելուց հետո»: Նրա ծանոթների խոսքով՝ հրապարակման համար նրան ոստիկանություն են կանչել: Այնտեղ, ինչպես հավաստել էր ակտիվիստը, իր դեմ բռնություն էր կիրառվել: Ծնողները Մագերամովայից պահանջել էին դադարեցնել ընդդիմադիր գործունեությունը: Ենթադրվում է, որ ճնշմանը չդիմանալով՝ նա վերջ է տվել իր կյանքին:
Շարժումը, որը ստեղծվել է 2011-ի մարտին, ակտիվորեն մասնակցել է ընդդիմության բողոքի ցույցերին: Մասնավորապես, շարժման անդամները մասնակցել են ադրբեջանական բանակում խաղաղ պայմաններում գրանցվող մարդկային կորուստների դեմ պայքարին:
