Կառավարության այսօրվա նիստը վարող նախագահ Սերժ Սարգսյանը խոսել է վերջին երեք խոշոր ընտրությունների մասին: Խորհրդարանական ընտրությունների արդյունքում, ըստ նրա, ձևավորվել է ողջ քաղաքական դաշտը ներկայացնող խորհրդարան: Նախագահական ընտրությունների արդյունքում, ըստ նրա, ունեցանք քաղաքական նոր մշակույթ: Իսկ մի քանի օր առաջ տեղի ունեցած Երևանի քաղաքապետարանի ընտրությունների ժամանակ մեր քաղաքացիները մեկ անգամ ևս բարձրաձայնեցին, որ պատրաստ են սատարել այն պաշտոնյաներին, ովքեր օրնիբուն աշխատում են, փոփոխություններ են անում մեր երկրում, և լարված աշխատանքը գերադասում են շոուներից:
Ըստ Սերժ Սարգսյանի` ամեն ընտրություն փորձություն է մեր երկրի և մեր երիտասարդ ժողովրդավարության համար: «Մենք անցանք այդ փորձությունների միջով բավականին վստահ և դուրս եկանք որպես պետութուն, որպես հասարակություն, ավելի ամրացած: Այժմ մեզ սպասում է 2008 թվականից ի վեր ամենաբարենպաստ ժամանակահատվածում ամբողջովին նվիրվելու մեր աշխատանքին, անմնացորդ և հետևողականորեն աշխատելու, մարդկանց հոգսերը լուծելու և արդյունքում ավելի ապահով Հայաստան կերտելու»,- ասել է Սերժ Սարգսյանը:
