Ռուսաստանի մայրաքաղաք Մոսկվայի քննչական մեկուսարանից փախուստ գործած Օլեգ Տոպալովը եղել է Կուրգանի կազմակերպված հանցախմբի վարձու մարդասպանների անդամ և աշխատել է Դեդ Հասանի համար՝ հաղորդում է «Իզվեստիա» թերթը:
Պարբերականի տվյալներով՝ Տոպալովը վերջին տարիներին ամենադաժան խմբավորման՝ Դմիտրի Լեսյանկովի (մականունը՝ Լես) ավազակախմբի անդամ է: Այս խմբավորումը վերջին տարիներին աշխատել է 2013թ. հունվարին սպանված Ասլան Ուսոյանի (Դեդ Հասան) կլանի շահերի համար:
Երկար ժամանակ Լեսի խմբավորումը եղել է ստվերում և չի հայտնվել իրավապահ մարմինների տեսադաշտում: Հանցագործների հետքի վրա հաջողվել է դուրս գալ 2009թ.՝ Մոսկվայում օրենքով գող Ալիկ Մինալյանի սպանությունից հետո, որը քրեական աշխարհում հայտնի է Ալիկ Սոչինսկի անունով: Մինչ սպանությունը Մինալյանը հակամարտության մեջ է եղել օրենքով մեկ այլ գող Արմեն Հարությունյանի (Արմեն Կանևսկի) և Դեդ Հասանի զարմիկի հետ, որոնք «նայում էին» Կրասնոդարի երկրամասը:
Քննիչները կարծում են, որ Մինալյանի սպանությանը մասնակից է ոչ միայն Լեսյանկով խմբի առաջնորդը, այլ նաև նրա հպատակները, այդ թվում՝ Տոպալովը:
Սակայն վերջինս ձերբակալվել է մեկ այլ հանցագործության համար: Հետաքննության տվյալներով՝ 2010թ. հուլիսին Տոպալովը և երկրորդ մարդասպանը սպանել են 32-ամյա Յուրի Զվեզդոչկինին՝ «Ռովստորմետ» սահմանափակ պատասխանատվությամբ ընկերության (սև մետաղների ներմուծման խոշոր ընկերություն) տնօրենին:
Այժմ Տոպալովի որոնմամբ զբաղվում է Մոսկվայի ոստիկանության ամբողջ կազմը: Քննչական կոմիտեն նշել է, որ Տոպալովին հաջողվել է փախուստ գործել պաշտոնատար անձանց անփութության պատճառով, համապատասխան հոդվածով հարուցվել է քրեական գործ:
