Աշխարհում խոշորագույն Facebook սոցցանցը իր գոյության 9 տարիների ընթացքում առաջին անգամ հայտնվել է ԱՄՆ 500 խոշորագույն ընկերությունների վարկանիշային աղյուսակում, որն ամեն տարի կազմում է ամերիկյան Fortune ամսագիրը: Այս մասին հայտնում է Vesti-ն:
Facebook-ը վարկանիշում զբաղեցրել է 482-րդ տեղը՝ առաջ անցնելով Yahoo!-ից: Վերջինս հայտնվել է 494-րդ հորիզոնականում: Վարկանիշը կազմելիս առաջնորդվել են ընկերությունների եկամտի ծավալով:
Սոցցանցը պատվավոր ցուցակում հայտնվելու համար պարտական է բարեհաջող ֆինանսական ցուցանիշին (5 մլրդ դոլար): Ընկերության 28-ամյա հիմնադիր և գլխավոր տնօրեն Մարկ Ցուկերբերգը դարձել է ցուցակում ամենաերիտասարդ գլխավոր տնօրենը:
Վարկանիշային ցուցակի առաջին տեղում Wal-Mart Stores մանրածախ վաճառքի ցանցն է, որի եկամուտը 2012-ին կազմել է 469.2 մլրդ դոլար: 2-րդ, 3-րդ, 4-րդ տեղերում նավթային ընկերություններ են՝ Exxon Mobil (449.9 մլրդ), Chevron (233.9 մլրդ) և Phillips 66 (169.6 մլրդ): Առաջնորդների հնգյակը եզրափակում է ներդրումային Berkshire Hathaway-ը՝ 162.5 մլրդ դոլար եկամտով:
Apple-ն անցած տարվա 17-րդ տեղից այս տարի բարձրացել է 6-րդ հորիզոնական (156.5)՝ առաջ անցնելով JP Morgan, Bank of America, General Electric, Ford, General Motors, AT&T, Verizon և Hewlett-Packard ընկերություններից: Ներկայում ընկերությունը տեխնիկական ընկերությունների շարքում զբաղեցնում է ամենաբարվոք դիրքերը:
