Հունվարի 5-ին «Նոր Հայաստան» ճակատի աջակից Սյուզաննա Գևորգյանի վրա հարձակվելու և նրան ծեծի ենթարկելու դեպքով հարուցվել է քրեական գործ՝ ՀՀ քրեական օրենսգրքի 117-րդ հոդվածի հատկանիշներով: Այդ մասին տեղեկացնում են Քննչական կոմիտեից:
Սյուզաննա Գևորգյանի վրա հարձակվել են Կոմիտաս 1 հասցեի մոտ երկու անհայտ տղամարդիկ, նրան գցելով գետնին՝ ոտքերով հարվածներ են հասցրել մարմնի տարբեր մասերին, այդ թվում նաև՝ դեմքին:
Նշենք, որ «Առավոտ» օրաթերթն ավելի վաղ գրել էր, որ աղջկա վրա հարձակվողները հեռացել են միայն այն ժամանակ, երբ նրա օգնության կանչերի վրա մարդիկ սկսել են մոտենալ, իսկ հարվածներ հասցնելու ժամանակ տղամարդիկ ասել են, թե՝ «քեզ ասացինք, որ հեռու մնաս, ինչու՞ չլսեցիր»:
Ըստ լրատվամիջոցի՝ Սյուզաննա Գևորգյանը բնակվում է Ռուսաստանում և Հայաստան է ժամանել հանրաքվեի ընթացքում «Ոչ»-ին աջակցելու համար և շարունակում է պայքարը հանրաքվեի արդյունքների կեղծման դեմ:
Նշվում է նաև, որ աղջիկն ամիսներ առաջ ևս նմանատիպ սցենարով հարձակման զոհ է դարձել. նրան ծեծել ու ահաբեկել են՝ պահանջելով հեռու մնալ պայքարից: Այդ ժամանակ նրան փորձել են հետ պահել Հիմնադիր խորհրդարանին աջակցելուց:
Լրատվամիջոցը նշում է նաև, որ Սյուզաննա Գևորգյանը վերջին շրջանում մի քանի անգամ սպառնալիքներ է ստացել: Սպառնացողներն ասել են, որ այս անգամ նախորդ անգամվա համեմատությամբ շատ ավելի խիստ են պատժելու նրան:
Իսկ ըստ Սյուզաննա Գևորգյանի՝ հունվարի 5-ին իր վրա հարձակվողներին նա հունվարի 1-ի և հունվարի 4-ի երեկոյան ժամերին նկատել է իր շենքի բակում:
