«ՄԻՊ-ի հրաժարականից հետո մենք այլևս որևէ գնահատականի կարիք էլ չունենք, որովհետև ամենացայտուն գնահատականը հենց եղավ ՄԻՊ-ի հրաժարականը,- քիչ առաջ Ազատության հրապարակում «Նոր Հայաստան» հանրային փրկության ճակատի հրավիրած մամուլի ասուլիսի ժամանակ այս մասին ասաց «Նոր Հայաստան»-ի անդամ, Քաղաքագետների միության նախագահ Հմայակ Հովհաննիսյանը՝ անդրադառնալով Հայաստանում Մարդու իրավունքների իրավիճակին:
Նրա խոսքով՝ վերջին շրջանում տեղի ունեցած իրադարձությունների խտացված դրսևորումն է Մարդու իրավունքների պաշտպանի աննախադեպ հրաժարականը. «Մարդու իրավունքների պաշտպանը պետք է գնահատական տար անցած հանրաքվեին, քվեարկությանը, պետք է գնահատական տար այն բիրտ, անողոք կեղծարարությանը, որը կատարվեց և որը կոչվում է քաղաքացիների ընտրական իրավունքի համակարգված ոտնահարում, պետք է հանդես գար համապատասխան զեկույցով: Եվ դրանից խուսափելու համար, հասկանալով, որ ինքը չի կարող գնալ ընդդեմ իր մասնագիտական, քաղաքացիական խղճի, բայց մյուս կողմից այս իշխանությունների բիրտ ճնշումների պայմաններում չի կարող օբյեկտիվ գնահատական տալ, հրաժարական տվեց:
Մեր երիտասարդների նկատմամբ բիրտ ճնշումները կասեցնելու, չեզոքացնելու, սեփական անօգնականության, անկարողության գիտակցումը Մարդու իրավունքների պաշտպանին ստիպեց հրաժարական տալ՝ իր պաշտոնավարման ավարտից երկու տարի առաջ»:
Մանրամասները՝ տեսանյութում:
