Երևանի ավագանու ընտրություններում գրանցված ընտրախախտումներից մեկի փաստով քրեական գործ է հարուցվել: Երեկ ՀՀ ոստիկանություն անհայտ քաղաքացուց ահազանգ էր ստացվել, որ թիվ 97 միջնակարգ դպրոցում գտնվող թիվ 11/32 ընտրատեղամասում մի քաղաքացու մոտ տեսել են 2 հատ քվեաթերթիկ: Մեկնած օպերատիվ խմբին հանձնաժողովի նախագահը հաղորդում է տվել, որ նույն օրը, ժամը 08:20-ին նկատել է մի տղամարդու, ով երկու ծրար ձեռքին մոտեցել է քվեատուփին, սակայն ինքը կանխել է ծրարները կնքելն ու քվեատուփ գցելը, որոնց մեջ հայտնաբերվել է մեկական քվեարկած քվեաթերթիկ: Ոստիկանության Շենգավիթի քննչական բաժնում ՀՀ քրեական օրենսգրքի 34-153-րդ հոդվածի 1-ին մասի հատկանիշներով հարուցվել է քրեական գործ:
Ինչպես «Առաջին լրատվական»-ի հետ զրույցում տեղեկացրեցին ՀՀ ոստիկանության հասարակայնության հետ կապի և լրատվության բաժնից, Ղազար Մկրտչյանի նկատմամբ խափանման միջոց է ընտրվել ստորագրությամբ երկրից չբացակայելը: Նա գործով հարցաքննվել է՝ որպես կասկածյալ: Գործով հանձնաժողովի անդամները ցուցմունք են տվել՝ որպես վկա: Ընտրողների ցուցակը ևս զննության է ենթարկվել:
