Ամերիկացի փորձագետները հայտարարում են Facebook սոցցանցի բաժնետոմսերի գերագնահատման մասին՝ հայտնում է Reuters գործակալությունը: Վերլուծաբանների կարծիքով՝ մեկ աժեթղթի իրական գինը չի գերազանցում 25 դոլարը:
Նշենք, որ սոցցանցի բաժնետոմսերի արժեքը բարձրացել է մայիսի 1-ին՝ 2013-ի առաջին եռամսյակի հաշվետվության հրապարակումից հետո: Մայիսի 3-ին Facebook-ի 1 բաժնետոմսի արժեքը կազմել է 28.31 դոլար, ինչը 60 տոկոսով ավելի է 2012-ի ամռան ցուցանիշից:
2013 թվականին Facebook-ի արժեքը 75 անգամ գերազանցել է ընկերության եկամուտների ցուցանիշները: Համեմատության համար նշենք, որ Google Inc-ի համանման ցուցանիշը տարբերվում է 20 անգամ: Ներկայում Facebook-ը գնահատվում է 71 մլրդ դոլար:
Հիշեցնենք, որ սոցցանցի եկամուտը 2013-ի առաջին երեք ամիսներին նախորդ տարվա նույն ժամանակահատվածի համեմատ աճել է 38 տոկոսով՝ հասնելով 1.46 մլրդ դոլարի, որից 1.25 միլիարդը ստացվել է գովազդից:
