Աշխարհում ավտոճանապարհային պատահարների հետևանքով տարեկան զոհվում է 1.24 մլն մարդ, որից 270 հազարը (22 տոկոս)՝ հետիոտն: Վերջիններիս շարքում գերակշռում են երեխաներն ու մեծահասակները: Այս մասին հայտնում է Առողջապահության համաշխարհային կազմակերպությունը:
Մահվան ելքով ճանապարհատրանսպորտային պատահարների զգալի մասը բաժին է ընկնում եկամուտների ցածր և միջին մակարդակներով պետություններին, որտեղ աճում է մեքենաների թիվը: Սակայն ընդհանուր առմամբ հետիոտնների անվտանգության հարցն ակտուալ է աշխարհի բոլոր երկրների համար:
ԱՀԿ-ի տվյալներով՝ ամեն շաբաթ ավտոճանապարհների վրա զոհվում է 5000 մարդ, որոնք գնում են դպրոց, աշխատավայր կամ կանգառում սպասում են հասարակական տրանսպորտի:
ԱՀԿ-ն այդ տվյալները հրապարակել է Ճանապարհային անվտանգ երթևեկության երկրորդ գլոբալ շաբաթվա նախօրեին, որը կանցկացվի մայիսի 6-12-ը:
