Եվրոպայի խորհրդի տեղական և տարածաշրջանային իշխանությունների կոնգրեսի պատվիրակության ղեկավար Ստյուարտ Դիքսոնն այսօր լրագրողների հետ հանդիպմանը խոսեց ոչ միայն ընտրություններում բարելավումների, այլև դեռևս առկա խնդիրների մասին:
Նա անդրադարձավ ԶԼՄ-ների կողմից ընտրատեղամասերում առկա տեսախցիկների առկայությանը: Դա մի կողմից՝ նպաստում է ընտրությունների թափանցիկությանը, մյուս կողմից՝ կարող է հակառակ ազդեցությունն ունենալ, անվստահության մթնոլորտ ստեղծել ընտրողների շրջանում, որովհետև գերվերահսկելի է դառնում ընտրական գործընթացը:
Խոչընդոտ էր նաև բջջային հեռախոսների օգտագործումը քվեների հաշվման գործընթացում:
Տեղամասերում մեծ քանակությամբ տեղական դիտորդներ կային: Որոշ դեպքերից կարելի էր ենթադրել, որ նրանք կուսակցությունների և դաշինքի օգտին էին գործում: Միջադեպերի վերաբերյալ Դիքսոնն ասաց, որ պաշտոնապես կհետևեն ներկայացված բողոքների ընթացքին. «Առանց անվտանգ և ապահով միջավայրի հնարավոր չի լինի ժողովրդավարական ընտրություններ իրականացնել: Ոչ մի բարելավում չի արձանագրվի, եթե կուսակցությունները չհասկանան, որ իրենք պատասխանատու են քաղաքացիներին ծառայելու և իրենց քվեներին տեր կանգնելու գործում»:
Ամփոփելով իր զեկույցը՝ նա շնորհակալություն հայտնեց ՀՀ իշխանություններին իրենց աշխատանքի անարգել անցկացմանը նպաստելու համար: Նա նշեց նաև, որ տասն օր հետո Հայաստանը ստանձնելու է Եվրոպայի խորհրդի նախագահությունը, որը շատ կարևոր քայլ է:
Լուսանկարը՝ PanARMENIAN Photo-ի
