CNN Türk-ի փոխանցմամբ՝ Թուրքիայի խորհրդարանի հայազգի պատգամավոր, «Ժողովուրդների դեմոկրատական» կուսակցության (ԺԴԿ) անդամ Գարո Փայլանը խորհրդարանում բարձրացրել է Բնակչության ծառայությունների մասին օրենքում ուղղումներ անելը։
Փայլանն առաջարկել է նույնականացման վկայականներից վերացնել կրոնական պատկանելության մասին պարտադիր գրառումը։ Նա ցուցադրել է իր նույնականացման վկայականը, որում գրված է «Քրիստոնյա» բառը, որը նրա կարծիքով կարող է հանգեցնել կրոնական փոքրամասնությունների հանդեպ խտրական վերաբերմունքի։
Փալյանն ընդգծել է, որ Թուրքիան այդ պատճառով տանուլ է տվել ՄԻԵԴ-ի դատերը և ուշադրություն է հրավիրել նրա վրա, որ ԵՄ-ի անդամ և ոչ մի երկրում նույնականացման վկայականում չի նշվում կրոնական պատկանելությունը։
Իր ելույթում Փայլանը հիշեցրել է, որ Լոզանի համաձայնագրից հետո Թուրքիայում կոդավորել են ազգային փոքրամասնություններին՝ հույներին՝ 1, հայերին՝ 2, հրեաներին՝ 3, ասորիներին՝ 4, և հարցրել է, թե ինչու է պետությունը գնացել այդ քայլին՝ ընդգծելով, որ փոքրամասնություններին տրված այդ կոդերը գործում են մինչ այժմ։
Փայլանը հիշեցրել է նաև Հայոց ցեղասպանության և դրան հաջորդած հայերի ունեզրկման, Ունեցվածքի հարկի մասին։ Փայլանի ելույթը հարուցել է խորհրդարանի ընդդիմադիր «Ժողովրդա-հանրապետական» ու «Ազգայնական շարժում» կուսակցությունների ներկայացուցիչների զայրույթը։
