Արգենտինայում ավելի քան 100 հազար մարդ փաստացի դարձել է անցած շաբաթվա կեսերից շարունակվող միջքաղաքային ավտոբուսների վարորդների և տրանսպորտային ձեռնարկությունների աշխատակիցների գործադուլի «զոհը»: Այս մասին հայտնում է RIA Novosti-ն:
Առավել բարդ իրադրություն է մայրաքաղաքում: Ավտոբուսային գլխավոր տերմինալը՝ «Ռետիրոն», ամբողջովին կաթվածահար է եղել:
Ավտոբուսները արգենտինացիների համար մնում են որպես հիմնական փոխադրամիջոց: Ներքին ավիաչվերթները քիչ են, նաև՝ թանկ: Երկաթուղային տրանսպորտն էլ թույլ է զարգացած: Արգենտինայի տրանսպորտի նախարարության տվյալներով՝ ավտոբուսներին է բաժին ընկնում երկրի ներքին ուղևորափոխադրումների 90 տոկոսը:
Գործադուլի կազմակերպիչներն արհմիություններն են, որոնք իշխանություններից պահանջում են բարձրացնել վարորդների աշխատավարձերն ու հրաժարվել «հեռացման սպառնալիքի» պրակտիկայից: Արհմիությունների ու նախարարության բանակցություններն արդյունք չեն տվել:
Երկրի ներքին գործերի և տրանսպորտի նախարար Ֆլորենսինո Ռանդացոն գործադուլն անվանել է արհմիությունների ու օպերատոր ընկերությունների դավադրության հետևանք: Նրա կարծիքով՝ նրանք մտադիր են սուբսիդիաներ ստանալ, որին կառավարությունը կտրականապես դեմ է: Իշխանություններն արդեն տուգանել են ավելի քան 130 ընկերության՝ ուղևորներին «ծառայություն չմատուցելու» համար:
