Նորվեգիայի թագավոր Հարալդ V-ը, որը երկու ամիս առաջ նշել է իր 76-ամյակը, իրականացրել է վաղեմի երազանքը՝ 4 օր բնակվելով Ամազոնի յանոմամո հնդկացիական ցեղի գյուղում: Ցեղի ներկայացուցիչները մինչև 20-րդ դարի կեսերը գրեթե կապ չեն ունեցել արտաքին աշխարհի հետ: Այս մասին հայտնում է ITAR-TASS-ը:
Լրագրողների հետ զրույցում միապետը, որը 40 տարի գլխավորել է Վայրի բնության համաշխարհային հիմնադրամի նորվեգական մասնաճյուղը, խոստովանել է, որ վաղուց է ցանկացել շրջագայել բրազիլական ջունգլիներում և չի կարողացել հրաժարվել այդ ուղևորությունից՝ ստանալով հրավեր ամազոնյան անտառների պահպանության նորվեգական հասարակության և յանոմամո ցեղի առաջնորդ Դավի Կոպենևայի կողմից:
Ապրիլի վերջին կայացած ուղևորության ընթացքում միապետին չեն ուղեկցել լրագրողներն ու նրա շրջապատի մարդիկ, նա ապրել է 120 հնդկացիների հետ մեկ տանիքի ներքո, քնել ցանցաճոճում:
Թագավորը, որն իր ուղևորությունն անվանել է «ֆանտաստիկ և միանգամայն ցնցող», ցեղի տղամարդկանց հետ գնացել է նաև որսի: Միապետին զարմացրել էր այն, թե ինչպես են նրանք որսի ժամանակ վայրի կենդանիների ձայներ արձակում:
Նորվեգիայի կառավարությունը մեծ գումարներ է հատկացնում ամազոնյան անձրևային անտառների պահպանության համար: 2009-2015 թվականներին ծրագրված է ավելի քան 1 մլրդ դոլար հատկացնել Բրազիլիային՝ Ամազոնի ջունգլիների փրկության նախագծերի համար:
