ԱՄՆ նախագահ Բարաք Օբամայի վարչակազմը դեռևս զերծ է մնում Սիրիայի ռազմական օբյեկտներին Իսրայելի հասցրած ավիահարվածների առնչությամբ ուղիղ մեկնաբանություններից, սակայն ըստ էության արդարացնում է օպերացիան՝ հիշատակելով հրեական պետության ինքնապաշտպանության իրավունքը: Կոնգրեսում փորձեր են ձեռնարկվել՝ օգտագործելու այդ իրադարձությունները սիրիական հակամարտությունում ԱՄՆ-ի կողմից ռազմական միջամտության հասնելու և սիրիական ընդդիմությանը զենքի մատակարարումներ սկսելու համար: Այս մասին հայտնում է ITAR-TASS-ը:
«ԱՄՆ նախագահը բազմիցս ասել է, որ Իսրայելը, որպես ինքնիշխան պետություն, իր քաղաքացիներին պաշտպանելու համար բոլոր անհրաժեշտ միջոցառումներն ընդունելու իրավունք ունի»,- կիրակի հայտարարել էր Սպիտակ տան պաշտոնական ներկայացուցիչ Ջոշ Էռնեստը:
Նա հրաժարվել է գնահատական տալ Սիրիայում հրեական պետության իրականացրած գործողություններին, սակայն ընդգծել է, որ Օբամայի կարծիքով՝ Իսրայելի անհանգստությունը «Հըզբոլլահ» խմբավորման կողմից սպառնալիքների առնչությամբ միանգամայն արդարացված է: Խմբավորումը փորձում է ստանալ սպառազինության ժամանակակից համակարգեր՝ ներառյալ մեծ հեռահարության հրթիռներ:
Ամերիկացի դեմոկրատ սենատոր Պատրիկ Լիհին ելույթ ունենալով NBC հեռուստաալիքի եթերում՝ հայտարարել է, որ իսրայելական ավիահարձակումը ցույց տվեց, որ Սիրիայի ՀՀՊ համակարգը, որը ստեղծված է Ռուսաստանի օգնությամբ, այնքան էլ լավը չէ, որքան բոլորն էին կարծում: Fox հեռուստաալիքի եթերում էլ հանրապետական Ջոն Մաքքեյնը հայտարարել է, որ այդ օպերացիան կարող է ուժեղացնել ճնշումը Օբամայի վարչակազմի վրա՝ ստեղծելով Սիրիայում ոչ թռիչքային գոտի և սկսելով ընդդիմադիր ուժերին մատակարարել զենք:
Ընդդիմադիրներին զինելու անհրաժեշտության մասին են խոսել են նաև ամերիկացի կոնգրեսականները: Նրանք ընդգծել են, որ զենքը պետք է ուղարկվի միայն արևմտամետ հայացքներով ընդդիմադիրներին, այլ ոչ նրանց, ովքեր մտնում են ահաբեկչական կազմակերպությունների շարքերը:
