Մոսկվայի Զամոսկվորեցկի դատարանը կրկին չի կարողացել ձեռնամուխ լինել ձեռնարկատեր Լևոն Հայրապետյանի նկատմամբ խարդախության հոդվածով քրեական գործն ըստ Էության քննելուն՝ կապված դատապարտված նախկին սենատոր Իգոր Իզմեստևի մորից 700 հազար դոլար ստանալու հետ։ Այս մասին հայտնում է TASS գործակալությունը։
Դատական նիստը մեղադրյալի փաստաբանի հիվանդության կապակցությամբ հետաձգվել է հունվարի 18-ին: Դատական նիստը տեղափոխելու միջնորդությամբ հանդես է եկել փաստաբան Օլգա Մորոզովան: «Խնդրում եմ դատարանին՝ հետաձգել դատական նիստն այն բանի կապակցությամբ, որ իմ պաշտպանյալի շահերը ներկայացնող փաստաբանը գտնվում է հիվանդանոցում, և ինձ հետ պայմանագիրը կնքվել Է միայն երեկ»,-ասել է նա: Միջնորդությունը բավարարվել է:
Դատարանն արդեն մեկ ամիս է՝ չի կարողանում ձեռնամուխ լինել գործն ըստ Էության քննելուն:
Լևոն Հայրապետյանը մեղադրվում Է ՌԴ Քրեական օրենսգրքի 159 հոդվածի չորրորդ մասով նախատեսված հանցագործություն (խարդախություն) կատարելու մեջ: Հետաքննության տվյալներով՝ 2010 թվականի հունիսից մինչև օգոստոս Հայրապետյանը, փաստաբան Սերգեյ Անտոնովի հետ համատեղ «խաբեության և վստահության չարաշահման ճանապարհով մոլորության մեջ է գցել Մոսկվայի բնակչուհուն՝ խոստանալով դրամական վարձատրության դիմաց հասնել նրա որդու նկատմամբ ավելի մեղմ դատավճռի կայացման»: Դրա դիմաց Հայրապետյանը նրանից դրամական միջոցներ է ստացել 700 հազար դոլարի չափով:
Լևոն Հայրապետյանը ձերբակալվել է 2014 թվականի հուլիսին նախկին սենատոր Իգոր Իզմեստեւի խոստովանական ցուցմունքներից հետո, որը ցմահ բանտարկության է դատապարտված առանձնապես ծանր մի շարք հանցագործություններ կատարելու համար:
