Վենեսուելայի կառավարությունը «բոլիվարական արժանապատվության ողջ հզորությամբ» հերքում է հայտարարությունը, որն ԱՄՆ նախագահ Բարաք Օբաման արել է Մեխիկոյում: Այս մասին ասվում է փաստաթղթում, որը տարածել է Վենեսուելայի ԱԳՆ-ն:
Նրանում նշվում է, որ Ուգո Չավեսի ղեկավարման տարիներին երկրում ստեղծվել է լիովին ավտոմատացված և թափանցիկ ընտրական համակարգ, և մարդու իրավունքները հարգվում են: «Նախագա´հ Օբամա, Վենեսուելայի ժողովուրդն օգտվում է այնպիսի լայն իրավունքներից ու ազատություններից, որոնց ամերիկյան հասարակությանը շուտ չի հաջողվի հասնել»,- ընդգծել է ԱԳՆ-ն:
ITAR-TASS-ի փոխանցմամբ՝ Սպիտակ տան ղեկավարի հայտարարություններն այն մասին, որ վենեսուելացի ժողովուրդն արժանի է իր ճակատագիրն ընտրելուն՝ առանց մեթոդների կիրառման, որոնցից հրաժարվել են Լատինական Ամերիկայի երկրների մեծ մասը, ԱԳՆ-ի հայտարարության մեջ գնահատվում են որպես սուտ, գրգռող և միջամտություն երկրի ներքին գործերին:
Դրանք չեն նպաստի երկկողմ հարաբերւությունների բարելավմանը, հակառակը՝ կհանգեցնեն էլ ավելի վատթարացման, ինչը միայն ողջ աշխարհի աչքում հաստատում է, որ ամերիկյան կառավարությունը Վենեսուելայի նկատմամբ իրականացնում է ագրեսիվ քաղաքականություն՝ ասվում է փաստաթղթում:
«Նախագա´հ Օբամա, Ձեր հայտարարությունները նպաստում են Վենեսուելայում Պինոչետի ի հայտ գալուն, ի դեմս պատմության՝ դուք պետք է պատասխանատվություն վերցնեք Ձեզ վրա, իսկ մենք մեր հերթին կկարողանանք պաշտպանել Բոլիվարի հայրենիքի խաղաղությունն ու կայունությունը»,-ասվում է հայտարարության մեջ, որում աշխարհի բոլոր անկախ կառավարություններին, ժողովուրդներին, քաղաքական ու հասարակական կազմակերպություններին կոչ է արվում ուշադրություն դարձնել Վենեսուելայում «շների պատերազմ» հրահրելու ԱՄՆ կառավարության նկրտումներին, որոնք ուղղված են իմպերիալիստական ներխուժումն արդարացնելուն: «Մենք՝ ազատագրող Սիմոն Բոլիվարի ու կոմանդանտե Չավեսի զավակներս, պատրաստ ենք պաշտպանել ցանկացած կայսերական գերակայությունից ազատ լինելու մեր իրավունքը»,- ասված է ԱԳՆ հայտարարության մեջ:
