2015թ. սկզբից մինչև դեկտեմբերի 31-ը հայկական զինված ուժերում՝ ներառյալ պաշտպանական բանակում արձանագրվել է մահվան 76 դեպք, որից 42-ը եղել է մարտական, իսկ 34-ը ոչ մարտական կորուստ: Իրավապաշտպաններն ու բանակի խնդիրներով զբաղվող հասարակական կազմակերպությունները այս թիվը մտահոգիչ են համարում:
Իրավապաշտպան Ժաննա Ալեքսանյանը «Առաջին լրատվական»-ի հետ զրույցում նշեց. «Այսպիսի թիվ, 2000թ.-ից այս կողմ, ես չեմ հիշում, սա զոհերի թվի կտրուկ աճ է»: Իրավապաշտպանի խոսքով՝ գոնե սահմանային լարվածության այս պայմաններում պետք է ոչ կանոնադրական պայմաններում զոհերի թիվը կրճատվեր. «Գոնե կարելի էր այնպիսի իրավիճակ ստեղծել, որ ներսում զոհեր չունենայինք: Սահմանին զոհեր ունենալն էլ արդարացված չէ. սա սխալ քաղաքականության արդյունք է»: Ժ. Ալեքսանյանի խոսքով՝ Զինվորական դատախազությունը վատագույնն է, անգործության է մատնված, երբեք չեն բացահայտվել գործերը, սպանությունները որակվում են ինքնասպանություններ:
«Բանակն իրականում» նախաձեռնության անդամ Զարուհի Հովհաննիսյանը ևս համոզված է, որ բանակում նախկինում տեղի ունեցած սպանությունները չբացահայտելը և անպատիժ թողնելը նպաստում է նոր հանցագործությունների իրագործմանը:
Մեզ հետ զրույցում Զ. Հովհաննիսյանը նշեց. «Երբ խոում ես բանակում ոչ կանոնադրական հարաբերությունների մասին, ասում են՝ Ադրբեջանի ջրաղացին ջուր ես լցնում: Այնինչ ընդհակառակը՝ մենք համարում ենք, որ եթե սահմանին այսպիսի լարվածություն է, և մենք գրեթե ամեն օր ունենք զոհ, ներսում առավել ևս պետք է այնպիսի իրավիճակ ունենանք, որ յուրաքանչյուր զինվորի կյանքը պահպանվի ամենաբարձր հովանավորության տակ:
Մանրամասները՝ տեսանյութում:
