Կիպրոսի ոստիկանությունը ձերբակալել է լրագրող Մանոլիս Կալատզիսին, որը կասկածվում է նախագահ Նիկոս Անտաստասիադուսին սպառնալիքներով նամակ ուղարկելու մեջ, հաղորդում է RIA Novosti-ն:
Դատարանը մերժել է նրան կալանելու միջնորդությունը` հայտարարելով, որ պետք է անցկացվի հավելյալ հետաքննություն:
Հունաստանի Կենտրոնական բանկի ղեկավար Պանիկոս Դիմիտրիադիսը և նախագահը սպանության սպառնալիքով նամակներ են ստացել այն բանից հետո, երբ Կիպրոսի իշխանությունները բանկերի վերակառուցման որոշում կայացրեցին:
ԿԲ-ի ղեկավարի կինն այդ ժամանակ ստիպված եղավ երեխաների հետ մեկնել արտասահման: Այս մասին ապրիլին հոդված է գրել լրագրող Կալատզիսը: Հոդվածում եղել է նաև նամակի լուսանկարը: Ոստիկանությունը պնդում է, որ նամակի ծրարին մնացել է գենետիկական նմուշ, որը, ինչպես պարզել է փորձաքննությունը, պատկանում է լրագրողին: Այս հիմքով ոստիկանությունը ձերբակալել է լրագրողին և փորձում է դատարանում նրան կալանելու իրավունք ստանալ:
Դատավորը մերժել է ոստիկանության միջնորդությունը: Արդարադատության նախարար Յոնաս Նիկոլաուն հայտարարել է, որ նա այս հարցը կքննարկի գլխավոր դատախազի հետ, քանի որ մեղադրանքները շատ լուրջ են և պետք է հետաքննվեն: Նախարարի խոսքերով` մեղադրանքները հետաքննելու համար կնշանակվի անկախ քննիչ:
