Վիեննան համալրել է քաղաքների ցուցակը, որտեղ Նոր տարվա գիշերը կանանց վրա հարձակումներ են իրագործվել: Այս մասին հայտնում է TASS-ը՝ հղում անելով ավստրիական ԶԼՄ-ներին: Հաղորդվում է, որ մայրաքաղաքի ոստիկանությունում հայտարարություն է ստացվել 3 աղջիկներից, որոնք տուժել են ներգաղթյալների գործողություններից:
Կատարվածի մասին հայտնի է, որ հարձակման զոհերը Նոր տարին դիմավորել են Վիեննայի Փրաթեր ժամանցային պարկում: Աղջիկներին անհանգստացրել և սեքսուալ ոտնձգության փորձ են կատարել մի քանի տղամարդ, որոնք, տուժածների նկարագրությամբ, ներգաղթյալներ են եղել: Երկու կանանցից գողացել են դրամապանակները, երրորդի պայուսակը պատռվել է:
Նախօրեին հայտնի դարձավ, որ ավստրիական Զալցբուրգի ոստիկանությունում ևս սկսել են նման հայտարարություններ ստացվել: Առայժմ խոսքը 7 դեպքի մասին է, որոնցում ներգաղթյալների բռնության օբյեկտ են դարձել կանայք:
Միաժամանակ Ավստրիայում սկանդալ է բռնկվում՝ կապված Վիեննայի գլխավոր ոստիկան Գերհարդ Պյուրստլի արտահայտությունների և կանանց ուղղված նրա խորհուրդների հետ: «Ընդհանրապես կանայք պետք է գիշերներն ուղեկցությամբ դուրս գան, խուսափեն վտանգավոր վայրերից և բարերում անծանոթների առաջարկած խմիչքները օգտագործելուց: Դա նախկինում ևս արդիական է եղել և այդպես կմնա ապագայում»,- ասել է նա Krone պարբերականին:
Մեղքը զոհերի վրա գցելու փորձն ասվտրիական հասարակությունը և շատ քաղաքական գործիչներ բացասաբար են ընդունել:
