Ակտիվիստ Զառա Հովհաննիսյանի հասցեին ֆեյսբուքում սպառնալիքներ հնչեցրած անձն այսօր իր մոր հետ ներկայացել է ոստիկանություն և խոստովանել, որ Հովհաննիսյանի հասցեին սպառնալիքներ հնչեցնողը ինքն է եղել։ Այս մասին «Առաջին լրատվական»-ի հետ զրույցում ասաց Հովհաննիսյանը։ Տղան 22-ամյա Անդրանիկ Ավետիսյանն է, և Զարուհու խոսքերով՝ մայրը, իմանալով որդու արածի մասին, անմիջապես նրան բերել է ոստիկանություն։
Հիշեցնենք, որ օրեր առաջ Անդրե Մակարով անունով օգտատերը Զարուհի Հովհաննիսյանի հասցեին սպառնալիքներ էր հնչեցրել Գևորգ Սաֆարյանի առնչությամբ Զարուհու գրառումների հետ կապված։ Դրանից հետո օգտատերն ակտիվիստին զգուշացրել էր. «Տնից դուրս գալուց կողքերդ նայի, զգույշ էղի էս երկու օրը, չսպանեն հանկարծ երեխուդ հետ»։
Այս սպառնալիքից հետո Զարուհին դիմել էր ոստիկանություն և այսօր, փաստորեն, սպառնալիքների հեղինակը նոր հորդորով ներկայացել է ոստիկանություն։
Զարուհին մեզ հետ զրույցւոմ ասաց, որ իրեն հավատ ներշնչեց, որ սպառնալիքների հեղինակը եղել է այդ տղան, քանի որ հենց ոստիկանությունում նա մուտք է գործել ֆեյսբուքյան էջ, փաստել, որ էջն իրեն է պատկանում և բացատրել, որ իրեն դուր չեն գալիս ընդդիմադիր հայացքներով անձինք և նրանց գործելաոճը։ «Այդ տղան ասում էր, որ իրեն դուր չի գալիս ընդդիմադիրների գործողությունները: Ցանկացած ընդդիմադիր հայացք ունեցող մարդու նկատմամբ նա խիստ մոտեցում ունի: Ինքն իրեն պարտավորված է համարում պաշտպանել պետական մարմինները»,-ասաց Հովհաննիսյանը: Վերջինիս խոսքերով՝ հենց ոստիկանությունում տղայի մայրը հավաստիացրել է , որ որդին այլևս կայքերում չի հայտնվի, որովհետև չգիտի իրեն պահելու ձևը։
Նշենք, որ հիշյալ օգտատերն արդեն իսկ նույն էջում ներողություն է խնդրել Զարուհի Հովհաննիսյանից՝ կատարելով հիշյալ գրառումը։ «Ես, Անդրե Մակարով օգտատերս՝ Անդրանիկ Ավետիսյանս, հրապարակավ ներողություն եմ խնդրում Զառա Հովհաննիսյանից, անձնական նամակով իր հասցեին իմ կողմից ուղղված անհիմն և անընդունելի գրառման համար, ինչպես նաև ներողություն եմ խնդրում Զառա Հովհաննիսյանի ընկերների հասցեին անձնական նամակի միջոցով ուղղված ոչ կոռեկտ գրառումների համար: Խոստովանեմ՝ ինքս խախտել եմ էթիկայի կանոնները՝ անցնելով անձնականի սահմանը, ինչի հարցում չստացվեց նրբանկատ և քաղաքավարի լինել բոլորի հանդեպ: Էթիկայի կանոնների իմ կողմից խախտումը պայմանավորված է եղել էմոցիայով և զայրույթով, ինչի համար ներողություն եմ հայցում: Հայցում եմ բոլոր օգտատերերի ներողամտությունը, ում տհաճություն է պատճառել ընտրածս «բառապաշարը»»:
