Ժնևում առաջիկա միջսիրիական բանակցությունների մասնակիցները չպետք է մոռանան, որ Սիրիայում շարունակվող հակամարտության յուրաքանչյուր լրացուցիչ օրը մարդկային շատ կյանքեր արժե: RIA Novosti-ի հաղորդմամբ՝ այս մասին Ժնևում ճեպազրույցի ժամանակ հայտարարել է ՄԱԿ-ի փախստականների հարցերով գերագույն հանձնակատար (ՄԱԿ-ի Փախստականների հարցերով գերագույն հանձնակատարի վարչություն) Ֆիլիպո Գրանդին:
«Ինչպես ես հասկանում եմ՝ կողմերը հակադիր դիրքորոշումների են հետամուտ: Բայց ես հուսով եմ՝ բոլորը, ովքեր ազդեցություն ունեն այդ բանակցությունների վրա, առաջին հերթին՝ հակամարտության կողմերի վրա, չեն մոռանա, որ այդ հակամարտության ամեն անցնող օրն իր արժեքն ունի մարդկանց կյանքերով, որոնք մահանում են, կորցնում են աշխատանքը, կրթություն չեն ստանում, հիվանդ են և ապրում են ոչ արժանի պայմաններում: Եվ ամեն անցնող օրն ավելի թանկ արժե, և մի անգամ մենք շատ ու շատ կամաչենք, որ մենք ավելի վաղ խաղաղության չենք հասել»,- ասել է նա:
Սպասվում է, որ միջսիրիական բանակցությունները երկրում իրավիճակի կարգավորման շուրջ պետք է սկսվեն Ժնևում հունվարի 25-ին: Մինչև այդ Սիրիայի հարցով ՄԱԿ-ի հատուկ հանձնակատար Ստաֆան դե Միստուրան պետք է ավարտի իր խորհրդակցությունները կարգավորման բոլոր մասնակիցների հետ:
