Ադրբեջանական Trend լրատվական գործակալության փոխանցմամբ` ԱՄՆ նախագահ Բարաք Օբաման Ադրբեջանի նախագահ Իլհամ Ալիևին հրավիրել է մասնակցելո Վաշինգտոնում կայանալիք միջուկային անվտանգության հարցերով 4-րդ գագաթնաժողովին։
Այս մասին Twitter-ի իր միկրոբլոգում գրել է Ադրբեջանի նախագահի աշխատակազմի ղեկավարի տեղակալ, արտաքին կապերի բաժնի պետ Նովրուզ Մամեդովը։ Նա ընդգծել է, որ Օբաման համապատասխան նամակն Ալիևին հղել է նախորդ տարվա դեկտեմբերի 3-ին։
Դրանում ԱՄՆ նախագահն ընդգծել է, որ Ադրբեջանը վճռական աջակցություն է ցուցաբերում գլոբալ միջուկային անվտանգության ճարտարապետությանը։ Իր նամակում Օբաման նաև հույս է հայտնել, որ Ադրբեջանը կշարունակի հատուկ ջանքեր գործադրել միջուկային ու ռադիոլոգիական թափոններն արգելելու համար։
Գագաթնաժողովն ԱՄՆ մայրաքաղաք Վաշինգտոնում կանցկացվի 2016 թվականի մարտի 31-ից ապրիլի 1-ը։ Առաջին գագաթնաժողովը 2010 թվականին անցկացվել է Վաշինգտոնում, երկրորդը՝ 2012 թվականին Սեուլում, իսկ երրորդը՝ 2014 թվականին Հաագայում։ Ավելի վաղ հաղորդվել էր, որ քիչ հավանական է, թե Օբաման այս անգամ Ալիևին կհրավիրի գագաթնաժողովին՝ կապված Ադրբեջանում խոսքի ազատությունների ճնշման հետ։
