Ամերիկացի հայտնի ներդրող Ուորեն Բաֆեթը հաշիվ է բացել Twitter միկրոբլոգում: Գրանցումից հետո տաս րոպեի ընթացքում նրա էջին հետևել է 10 հազար մարդ, իսկ երեք ժամ անց այդ թիվը կազմել է 140 հազար, հաղորդում է BBC-ն:
Բաֆեթը, որը Berkshire Hathaway ընկերության ղեկավարը և նախագահն է, հայտնի է նոր տեխնոլոգիաների հանդեպ իր զգուշավոր վերաբերմունքով: Berkshire Hathaway-ին պատկանում է շուրջ 80 ընկերություն՝ աշխարհի տարբեր երկրներում: Ընկերության շահույթի հիմնական մասն ապահովում է ապահովագրությունը և կոմունալ ծառայությունների մատակարարումը:
Berkshire Hathaway-ը խոշոր շահաբաժիններ ունի նաև Coca-Cola-ում, Wells Fargo IBM-ում:
Twitter-ում Բաֆեթի առաջին հաղորդագրությունը հայտնվել է ինտերնետ-համաժողովի ժամանակ, որը կազմակերպել է Fortune ամսագիրը:
Այս հանգստյան օրերին Բաֆեթը նախագահելու է Berkshire Hathaway-ի բաժնետերերի ամենամյա հանդիպման ժամանակ: Ակնկալվում է, որ հանդիպմանը կհավաքվի ավելի քան 35 հազար մարդ: Ձևավորված ավանդույթի համաձայն՝ մասնակիցները նրա ելույթի հիմնական թեզերը փոխանցելու են Twitter-ի միջոցով:
