Թուրք ազգայնականների Yeni Çağ թերթի փոխանցմամբ, ԱՄՆ-ը Սևրի պայմանագրից (1920 թվականի օգոստոսի 10) շուրջ 90 տարի անց ողջ ուժով լծվել է «Մեծ Քրդստանի» պլանի կենսագործմանը: ԱՄՆ-ը դա սկսեց Իրաքի մասնատումից, այժմ եկել է Սիրիայի մասնատման ժամանակը: ԱՄՆ-ը սկսել է ուժեղ ճնշում գործադրել Դամասկոսի վարչակարգի տապալման համար: Հաջորդ զոհերն են լինելու Թուրքիան ու Իրանը:
Քրդական պետության պլանը պատրաստ էր դեռևս 90 տարի առաջ` նախագահ Վիլսոնի ժամանակ: Գերմանական Die Welt թերթը նշում է, որ սիրիական գործող իշխանությունների տապալումից հետո սիրիական քրդերն ինքնավարություն կպահանջեն: Դա մեծապես անհանգստացնում է Թուրքիային, քանի որ դրանով նաև ամրագրվում են «Քրդստանի աշխատավորական» կուսակցության (PKK) դիրքերը:
ԱՄՆ-ը արդեն իսկ քրդական խամաճիկային պետություն է ստեղծել Իրաքի հյուսիսային հատվածում (6 միլիոն քուրդ) և մնացել է քրդական ամբողջական պետության ստեղծման համար տարածքներ խլել քրդական ստվար բնակչություն ունեցող մյուս երեք երկրներից` Սիրիայից (1.4 միլիոն քուրդ), Թուրքիայից (15 միլիոն քուրդ) ու Իրանից (7 միլիոն քուրդ):
Սիրիայի հետ հաշիվները վերջացնելուց հետո ԱՄՆ հայացքը գամվելու է Թուրքիայի ու Իրանի վրա:
Հիշեցնենք, որ մարտի վերջին թուրքական Hürriyet թերթի սյունակագիր Յուսուֆ Քանլին իր «Նոր Սայքս-Պիկոյի համաձայնությո՞ւն» խորագրով հոդվածում նշում էր, որ Թուրքիան խորապես անհանգստացած է այն հանգամանքից, որ Օսմանյան կայսրության տիրույթների բաժանման մասին այդ համաձայնագրի կնքումից (1915) շուրջ 100 տարի անց Արևելքը դարձյալ բոցերի մեջ է, և նախորդ հարյուրամյակի նման դարձյալ գլխավոր դերերում են Մեծ Բրիտանիան, Ֆրանսիան, Իտալիան, ԱՄՆ-ը (նախկին Անտանտ):
Թուրք լրագրողն ուշադրություն էր հրավիրում այն հանգամանքի վրա, որ Սայքս-Պիկոյի համաձայնագիրը հետագայում հանդիսացավ 1920 թվականի օգոստոսի 10-ին կնքված Սևրի պայմանագրի հիմքը, ըստ որի` Թուրքիայի արևելքում պետք է ստեղծվեր հայկական պետություն, իսկ հարավ-արևելքում` քրդական պետություն: