«Որքան ել սակավաթիվ են եղել «Բարև Երևան»-ի հանրահավաքի մասնակիցները, ըստ իս՝ Հայաստանում երկու միլիոն մարդ է բնակվում, բայց ոչ ոքի քարոզարշավին հարյուր հազարից շատ մարդ չի գալիս»,- այսօր լրագրողների հետ հանդիպման ժամանակ ասաց «Բարև Երևան» դաշինքի համամասնական ցուցակը գլխավորող Արմեն Մարտիրոսյանը։ «Անմիջական կապ տեսնել հավաքի մասնակիցների և քվեի մեջ՝ սխալ է: Մենք գուցե սխալ ժամի ենք պլանավորում՝ ժամը երեքին շատ շոգ էր, կամաց-կամաց փորձ ենք ձեռք բերում: Հետո հաշվի առեք, որ մեր հանրահավաքին մարդիկ գալիս են իրենց ցանկությամբ, մեզ մոտ գործարարներ չկան, որ մարդկանց հրահանգեն գալ, և մարդիկ ազատ են իրենց ընտրության մեջ»,- հավելեց նա:
Արմեն Մարտիրոսյանն անդրադարձավ նաև այլ քաղաքական ուժերին և նշեց, որ իրենք ապացուցելու ոչինչ չունեն. «Մենք հրահանգել ենք մեր հաձնաժողովի անդամներին և վստահված անձանց աշխատել այն քաղաքական ուժերի հետ, որոնք ուզում են արդար ընտրություններ անցկացնել»:
Իր հերթին ասուլիսի մյուս բանախոսը՝ «Բարև Երևան» դաշինքի համամասնական ցուցակում ընդգրկված Դավիթ Սանասարյանն ասաց. «Ես չեմ կարողանում պատկերացնել համագործակցություն այլընտրանքային կամ կիսաընդդիմադիր այն ուժերի հետ, որոնք ընտրակաշառք են բաժանում»:
Այն հարցին, թե երբ խոսում են «սև» PR-ի մասին, արդյո՞ք դրա դրսևորում չէ անընդհատ Վոլոչկովայի անունը շոշափելը, Ա. Մարտիրոսյանը պատասխանեց. «Անաստասիա Վոլոչկովային ես կարող եմ շոշափել: Ես կարծում եմ, որ Անաստասիա Վոլոչկովան մեր մշակութային արժեքների մեջ չի մտնում: Եթե ես քաղաքապետ լինեի, Պլիսեցկայային կհրավիրեի: Վաղը չէ մյուս օրն էլ Վարդային կբերեն կաթողիկոսի դիմաց կպարի»:
Արմեն Մարտիրոսյանն ասուլիսի վերջում կոչով դիմեց երևանցիներին. «Ձեր մասնակցությամբ կարող եք ամրապնդել փետրվարի 18-ի մեր հաղթանակը: Դուք ձեր քվեարկությամբ կարող եք կառավարման համակարգ փոխել»։
Լուսանկարը՝ PanARMENIAN Photo-ի
