Քրդական Fırat լրատվական գործակալության փոխանցմամբ, Թուրքիայում քրդերի բողոքի ակցիաներն ու ձերբակալությունների ալիքը սկսվեցին այն բանից հետո, երբ ապրիլի 18-ին երկրի Բարձրագույն ընտրական խորհուրդը (YSK) վետո դրեց քրդական «Խաղաղություն ու ժողովրդավարություն» կուսակցության (ԽԺԿ) 7 անկախ թեկնածուների առաջադրման վրա:
YSK-ի որոշումից 3 օր անց` ապրիլի 21-ի դրությամբ, արդեն կային ավելի քան 500 ձերբակալվածներ: Ապրիլի 25-ին այդ ցուցանիշը հասավ 700-ի, իսկ ապրիլի 29-ին` 880-ի (որից 30-ը` ապրիլի 29-ին):
Փաստորեն, ապրիլի 19-29-ին զոհվել է 2 մարդ, ձերբակալվել է նվազագույնը 880 մարդ, որոնցից կալանվել է 120-ը: Վերջիններիս թվում են հայտնվել կանայք, երեխաներ, աշակերտներ, ԽԺԿ ղեկավարներ և մարդու իրավունքների պաշտպաններ:
Հիշեցնենք, որ քրդերի ճնշման ներքո YSK-ն ստիպված եղավ հետքայլ կատարել և քուրդ թեկնածուներին թույլատրել` մասնակցելու հունիսի 12-ին կայանալիք խորհրդարանական ընտրություններին: