«Առաջին լրատվական»-ի տեղեկություններով՝ երեկ ՀՀ ոստիկանության Նաիրիի բաժնի պետ Կորյուն Հարությունյանը աշխատանքի վայրից դուրս գալիս ասել է, որ գնում է մասնակցելու աներոջ ծննդյան արարողությանը: Սակայն, ըստ մեր աղբյուրների, ավելի ուշ սկսել է չպատասխանել հեռախոսազանգերին, ինչն էլ ստիպել է աշխատակիցներին այսօր ահազանգել ՀՀ արտակարգ իրավիճակների նախարարության փրկարար ծառայության օպերատիվ կառավարման կենտրոն:
Մեր աղբյուրի համաձայն, Կորյուն Հարությունյանը ընդամենը մեկ շաբաթ առաջ է նշանակվել ոստիկանության Նաիրիի բաժնի պետ:
Նշենք, որ այսօր առավոտյան` ժամը 10:30-ի սահմաններում, Հրազդան քաղաքի մոտ գտնվող գերեզմանատանը՝ հոր գերեզմանի մոտ հայտնաբերվել էր Ոստիկանության Նաիրիի բաժնի պետ Կորյուն Հարությունյանի դին` հրազենային վնասվածքով: Անմիջապես դեպքի վայր էին ժամանել Ոստիկանության Կոտայքի մարզային վարչության աշխատակիցները՝ մարզի ոստիկանապետ Գրիշա Բադալյանի գլխավորությամբ, ինչպես նաև՝ ոստիկանության քննչական գլխավոր վարչության Կոտայքի մարզի քննչական բաժնի քննիչները՝ քննչական բաժնի պետ Վալենտին Պապյանի գլխավորությամբ:
Տեղանքի զննությունը շարունակվում է:
Լուսանկարները՝ Shamshyan.com-ի
