RBC-ի փոխանցմամբ՝ Թուրքիան ռուսական «Սու-24» ինքնաթիռի խոցումից հետո բացասական համատեքստում ռուսական ԶԼՄ-ներում հիշատակվելու ցուցանիշով զբաղեցրել է առաջին տեղը՝ իր հետևում թողնելով ԱՄՆ-ին ու Ուկրաինային։ Այդ մասին է վկայել «Մեդիալոգիայի» հետազոտությունը։
Վերջինիս համաձայն՝ ռուսական ԶԼՄ-ները Թուրքիայի՝ որպես Ռուսաստանի թշնամու մասին նոյեմբերին նշել են 322 անգամ, իսկ դեկտեմբերին՝ 1487 անգամ։ Միևնույն ժամանակահատվածում ԱՄՆ-ն ու Ուկրաինան բացասական երանգով հիշատակվել են նոյեմբերին համապատասխանաբար 2401 և 1990 անգամ, իսկ դեկտեմբերին՝ 1019 և 859 անգամ։
Դաշնային հեռուստաալիքներից մեկի աշխատակիցը, որի անունը չի հրապարակվում, հայտարարել է, որ Թուրքիայի վերաբերյալ որևէ հատուկ ցուցում չի եղել, և որ լրատվամիջոցները հիմնականում կողմնորոշվել են Ռուսաստանի նախագահ Վլադիմիր Պուտինի արած հայտարարություններով։
Ընթացիկ տարվա առաջին կեսին նման վարկանիշների առաջնորդն Ուկրաինան էր, որի հանդեպ վերաբերմունքը տարեվերջին կայունանում է։ Հետազոտության մեջ նշված է, որ Ուկրաինայի հանդեպ բացասական վերաբերմունքը չի աճել Ղրիմի սննդային շրջափակումից ու հոսանքազրկումից հետո։
Հոկտեմբերին ԱՄՆ-ն այդ հարցում գերազանցել է Ուկրաինային, ինչը տեղի է ունեցել Սիրիայում ռուսական ռազմական գործողության մեկնարկից հետո։
