Մուսուլմանների մեծ մասը կցանկանար ապրել շարիաթի օրենքներով, սակայն վերջինիս ոչ բոլոր դրույթներն են համարում կիրառելի: Ինչպես հաղորդում է BBC-ն, նման արդյունքներ են ստացվել հարցման ընթացքում, որն անցկացրել է ամերիկյան Pew Research Centre-ը: Հարցմանը մասնակցել է 38 հազար մարդ՝ 39 երկրներից, որտեղ բնակչության զգալի մասը կազմում են մուսուլմանները: Հարցման մասնակիցների մեծ մասը ցանկանում է, որպեսզի քաղաքացիական վեճերը լուծվեն շարիաթի օրենքներով: Սակայն նրանք տարակարծիք են այն հարցում, թե արդյոք, ըստ շարիաթի, քրեական գործերում պե՞տք է կիրառվեն խիստ պատիժներ:
Տարբեր երկրներում տարբեր է շարիաթը որպես հիմնական օրենք հայտարարելու գաղափարի հանդեպ վերաբերմունքը: Օրինակ՝ թուրքերի միայն 12%-ն է կողմ այս նախաձեռնությանը, այն դեպքում, երբ Ինդոնեզիայում այս գաղափարին աջակցում է 72%-ը, Եգիպտոսում՝ 74%-ը, իսկ Աֆղանստանում՝ 99%-ը:
Հետազոտության արդյունքների համաձայն՝ մուսուլմանական երկրների բնակիչների մեծ մասը հակասություն չեն տեսնում իսլամի և ժամանակակից կյանքի միջև, սիրում են արևմտյան երաժշտությունը և կինոն՝ չնայած ոմանք համոզված են, որ դա խարխլում է հասարակության բարոյականության հիմքերը: Միևնույն ժամանակ իսլամ դավանող մարդկանց մեծ մասը անբարոյական է համարում մարմնավաճառությունը, հոմոսեքսուալիզմը, ինքնասպանությունը, ալկոհոլի օգտագործումը:
Հարցման մասնակիցների կեսից ավելին իրենց մտահոգությունն են հայտնել կրոնական ծայրահեղականության կապակցությամբ, այդ թվում՝ Եգիպտոսում, Իրաքում, Թունիսում:
Ամերիկացի մուսուլմանների 81%-ի կարծիքով՝ բռնությունը չի կարող արդարացվել որևէ հիմքով, իսկ աշխարհում այս ցուցանիշը կազմում է միջինը 73%: Եգիպտոսում, Աֆղանստանում, պաղեստինյան տարածքներում հարցման մասնակիցների զգալի փոքրամասնությունն է կողմ մահապարտների կիրառման պրակտիկային:
Տարբեր երկրներում հարցման մասնակիցները տարակարծիք են բազմակնության հարցում: Մասնավորապես, Բոսնիայում մուսուլմանների միայն 4%-ն է նման պրակտիկան կիրառելի համարում՝ այն դեպքում, երբ Նիգերիայում այդ թիվը հասնում է 87%-ի: Երկրների մեծ մասում հարցման մասնակիցները պնդում են, որ կինը պետք է ենթարկվի իր ամուսնուն, սակայն դրա հետ մեկտեղ կարծում են, որ կինն ինքը պետք է որոշի՝ կրե՞լ չադրա, թե՞ ոչ:
Փորձագետներն ընդգծում են, որ մուսուլմանների շրջանում չկա համաձայնություն, թե ինչ է շարիաթը: Տարբեր երկրներում՝ կախված տեղի ավանդույթներից և պատմությունից, շարիաթը տարբեր կերպ են ըմբռնում:
