Ադրբեջանական Anspress.com կայքի փոխանցմամբ, Ադրբեջանի նախագահ Իլհամ Ալիևը Ուկրաինայի նախագահ Վիկտոր Յանուկովիչի հետ հանդիպման ժամանակ անդրադարձել է նաև ղարաբաղյան հակամարտության կարգավորմանը.
«Ղարաբաղյան հակամարտությունը մեծ սպառնալիք է ներկայացնում տարածաշրջանի խաղաղությանն ու կայունությանը: Այն խոչընդոտում է տարածաշրջանային համագործակցության զարգացմանը:
Չնայած բոլոր դժվարություններին` Ադրբեջանը շարունակում է զարգանալ: Ես ցանկանում եմ շնորհակալություն հայտնել Ուկրաինայի նախագահին ղարաբաղյան հակամարտության կարգավորման հարցում ցուցաբերած սկզբունքային դիրքորոշման համար, ինչն իր արտացոլումը գտավ համատեղ հայտարարության մասին կնքված փաստաթղթում:
Դրանում նշված է, որ ղարաբաղյան հակամարտությունը պետք է կարգավորվի միջազգային իրավունքների սկզբունքների ու նորմերի հիման վրա` հաշվի առնելով պետության տարածքային ամբողջականությունը, ինքնիշխանությունն ու պետական սահմանների անխախտությունը»:
Հիշեցնենք, որ երեկ Ալիևն ու Յանուկովիչը ստորագրել են երեք փաստաթուղթ. «2011-2015 թվականներին Ադրբեջանի ու Ուկրաինայի միջև բազմակողմ համագործակցության միջոցառումների պլանը», «Ռազմավարական գործընկերության հետագա զարգացման մասին նախագահների հնչեցրած համատեղ հայտարարությունը», և «Ադրբեջանի ու Ուկրաինայի նախագահների խորհրդի երրորդ նստաշրջանի արձանագրությունը»:
